პრემიერმინისტრის განცხადების შემდეგ თანაგუნდელებმა, როგორც სჩვევიათ, მისი დაცვა დაიწყეს. დეპუტატი, დავით მათიკაშვილი ღარიბაშვილის კრიტიკოსებს ფეისბუქპოსტით გამოეხმაურა, ხოლო ეკონომიკის მინისტრმა, ლევან დავითაშვილმა მათ სამთავრობო ტრიბუნიდან უპასუხა.

რატომ არის მნიშვნელოვანი: იმის გარდა, რომ ღარიბაშვილმა აგვისტოს ომის მე-14 წლისთავზე განცხადება არა 7, არამედ 8 აგვისტოს გამოაქვეყნა, პოსტში მან აფხაზეთის ოკუპაციის პერიოდი შეამცირა.

• "14 წელია ჩვენი ქვეყნის გული — სამაჩაბლო, ცხინვალის რეგიონი და აფხაზეთი რუსეთის მიერ არის ოკუპირებული", — წერდა ის.
• მართალია, "დამოუკიდებლებად" რუსეთმა ეს რეგიონები აგვისტოს ომის შემდეგ აღიარა, თუმცა აფხაზეთზე კონტროლი საქართველოს ხელისუფლებამ 1990-იან წლებში, ომის შემდეგ დაკარგა.
• დღეს ჟურნალისტებმა პრემიერთან ამის დაზუსტება სცადეს, თუმცა ღარიბაშვილმა მათი ინტერესი პროვოკაციად შეაფასა.

რა თქვა მათიკაშვილმა: პრემიერმინისტრის მსგავსად, დეპუტატმა არ ახსენა ის, რომ სოხუმის დაცემის შემდეგ აფხაზეთს სწორედ რუსეთი მართული სეპარატისტული ჯგუფები აკონტროლებდნენ.

• ნაცვლად ამისა, დაწერა, რომ 2008 წლამდე რუსული ჯარი ამ რეგიონში სამშვიდობო სტატუსით იდგა.
• ასევე, მათ ვინც ღარიბაშვილის განცხადება გააკრიტიკა, ბოლოდროინდელი თემების "ელემენტარულ არცოდნაში" დასდო ბრალი და "მეტის წაკითხვა" ურჩია.
• მანვე ღარიბაშვილის გასამართლებლად სტრასბურგის სასამართლოს ისტორიული გადაწყვეტილებაც ახსენა, სადაც წერია, რომ რუსეთი საქართველოს ორ რეგიონზე ეფექტურ კონტროლს 2008 წლიდან ახორციელებდა.

კონტექსტი: 1990-იან წლებში მიმდინარე კონფლიქტების შემდეგ, რუსეთმა ისარგებლა სიტუაციით და საქართველო რეგიონებში "მშვიდობისმყოფელების" შეყვანაზე დაითანხმა. ისტორიკოსების შეფასებით, მაშინ ქვეყანა დიპლომატიურად იზოლირებული იყო და ამიტომაც რუსეთმა შეძლო მისი იძულება.

• აფხაზეთში მთელი სამშვიდობო კონტინგენტი რუსი სამხედროები იყვნენ. ცხინვალის რეგიონში კი განსხვავებული ფორმატი იყო, რომელიც 3 ბატალიონისგან შედგებოდა.
• სხვადასხვა ჩანაწერი მოწმობს, რომ აგვისტოს ომის დროს ცეცხლი ე.წ. მშვიდობისმყოფელების სტატუსით მყოფმა რუსმა ჯარისკაცებმაც გახსნეს.

რა თქვა დავითაშვილმა: ვიცე-პრემიერი ამბობს, რომ პრემიერმა "ყველაფერი მშვენივრად იცის".

• "უბრალოდ ფაქტებს ვერ გავექცევით, აფხაზეთის მნიშვნელოვანი ნაწილი, კოდორის ხეობა ზუსტად ამ პერიოდში დაიკარგა", — განაცხადა მან.

პოსტს გამოეხმაურენ ევროპულ საქართველოშიც. გიგა ბოკერიას თქმით, ის, რა აფხაზეთში 90-იანი წლების დასაწყისში მოხდა, 2008 წლის სისასტიკესა და მსხვერპლის მასშტაბთან შედარებით განსხვავებულია.

• "მაშინ არც NATO-ს საკითხი იდგა, არც ევროკავშირის, არავინ არ იყო. საბჭოთა კავშირი დაინგრა და რუსეთი დასუსტებული იყო, მაგრამ საქართველო იმ არასწორ მხარეს მოხვდა და რაც ნანგრევების მტვერით წარმოშვა".
• "ეს უნდა იცოდეს საქართველოს ყველა მოქალაქემ. ამ ტყუილს ემსახურება, რომ 14 წლის წინ დაიკარგა აფხაზეთიო, თითქოს მანამდე ყველაფერი კარგად იყო".
• "ღარიბაშვილს უნდა, რომ ისევ მაგ დღეში ვიყოთ. როცა სახელმწიფო არ გაქვს, მაშინ არის სისხლისღვრა და მსხვერპლი უფრო დიდი და ნუ ატყუებენ ხალხს".