ქართული ოცნების აღმასრულებელი მდივანი აცხადებს, რომ სახალხო დამცველი "ამართლებს ქსენოფობიურ კამპანიას" და მასში ჩართულია.

რატომ არის მნიშვნელოვანი: დღეს კობახიძემ ბრიფინგი იმისთვის გამართა, რომ საქართველოში შემოსული რუსები დაეცვა.

  • მმართველი პარტია საქართველოში შემოსული ოკუპანტი ქვეყნის მოქალაქეების მიმართ საზოგადოების კრიტიკულ დამოკიდებულებას ქსენოფობიასა და დისკრიმინაციას უწოდებს.
  • ქართულმა ოცნებამ სახალხო დამცველის დისკრედიტაცია უკვე არაერთხელ სცადა.

მდინარაძის თქმით, ომბუდსმენი ამართლებს მათ, ვინც რუსეთის მოქალაქეების მიმართ"ქსენოფობიურადაა" განწყობილი და ამით აწარმოებს "ქსენოფობიურ კამპანიას".

  • რომელი ქვეყნის წარმომადგენელიც არ უნდა იყოს და რასაც არ უნდა შვებოდეს მისი ქვეყანა თუ მისი ხელისუფლება, ეროვნული თუ ეთნიკური ნიშნით ადამიანის განსხვავება და მასზე თავდასხმების მოწოდება კიდე ზემოდან არის სიბნელე, ქსენოფობია და წარმოუდგენელი რამ თანამედროვე ცივილიზებულ სამყაროში."
  • "სამწუხაროდ ჩვენ სახალხო დამცველი არ გვყავს. ეს არის ნაცების სახალხოდ დამცველი", — ამბობს მდინარაძე ლომჯარიაზე და ამით მის დისკრედიტაციას ცდილობს.

მანამდე ნინო ლომჯარიაზე ირაკლი კობახიძემ ისაუბრა.

  • "როდესაც ღვივდება დისკრიმინაციული კამპანია, ეთნიკური შუღლი, შოვინიზმი პირდაპირ პირველივე დღეს და პირველივე წამებზე უნდა გამოეხმაუროს ამას სახალხო დამცველი. ახლა ჯერჯერობით არავითარი განცხადება მისგან არ გვესმის", — თქვა კობახიძემ.
  • მდინარაძის მსგავსად ისიც შეეცადა სახალხო დამცველის დისკრედიტაციას და თქვა, რომ ის "პირდაპირ ჩართული პოლიტიკურ პროცესებში", თუმცა "რეიტინგი არ აქვს".

ლომჯარიას თქმით, "ოცნების" ადგილას თავდასხმებს არ აწარმოებდა, რადგან ეს მხოლოდ აძლიერებს ომბუდსმენს.

  • "სახალხო დამცველი არის დამოუკიდებელი აბსოლუტურად ინსტიტუტი და არცერთი პოლიტიკოსის შესაფასებელი და მით უმეტეს გადასაწყვეტი და მისათითებელი არ არის როდის რას გადაწყვეტს."

  • "ცოტა არ იყოს მიკვირს, რატომ უკვირთ პოლიტიკოსებს მმართველი პარტიიდან, რომ შესაძლებელია საქართველოს მოქალაქეებს ჰქონდეთ ნეგატიური განწყობები რუსეთის ხელისუფლების და იმ მოქალაქეების მიმართ, რომლებიც შეიძლება, იბრძოდნენ, ან მომავალში, როდესაც მათი ხელისუფლება დაუძახებს, იბრძოლონ ამ ქვეყნის წინააღმდეგ", — ამბობს სახალხო დამცველი.