მთიან ყარაბაღში სიტუაცია ისევ დაძაბულია — ადგილობრივმა ლიდერმა ნაწილობრივი მობილიზაცია გამოცხადა. ბოლო დღეებში დაწყებულ დაპირისპირებაში სომხეთი და აზერბაიჯანი, ტრადიციულად, ერთმანეთს ადანაშაულებს.

რატომ არის მნიშვნელოვანი: 2020 წლის 10 ნოემბერს, 40-დღიანი ომის შემდეგ, სომხეთმა, აზერბაიჯანმა და რუსეთმა სამშვიდობო შეთანხმებას მოაწერეს ხელი, რომლის მიხედვითაც სომხეთს აზერბაიჯანისთვის ტერიტორიების გადაცემა მოუწია, ხოლო ლაჩინში შეიქმნა დერეფანი, სადაც "რუსი სამშვიდობოები" განლაგდნენ.

• ამის შემდეგ ცეცხლის შეწყვეტის შეთანხმება არაერთხელ დაირღვა და სხვადასხვა მონაცემით, მეორე ომის დასრულების შემდეგ, რამდენიმე ასეული ადამიანი დაიღუპა.

რა მოხდა: ჯერ კიდევ 28 ივლისს არცახის წარმომადგენლებმა განაცხადეს, რომ აზერბაიჯანულმა მხარემ ცეცხლი გახსნა. ოფიციალური ბაქო ბრალდებებს უარყოფდა.

• თუმცა, რადიო თავისუფლების სომხური ბიუროს ინფორმაციით, 30 ივლისს რუსეთის ე.წ. სამშვიდობო კონტინგენტმა, ფაქტობრივად, დაადასტურა ეს ინფორმაცია, როცა ცეცხლის შეწყვეტის რეჟიმის დარღვევაზე ისაუბრა.
• პირველ აგვისტოს მთიანი ყარაბაღის წარმომადგენლობამ განაცხადა, რომ აზერბაიჯანულმა ქვედანაყოფებმა საკონტაქტო ხაზის გადაკვეთა სცადეს და "პროვოკაციას მიმართეს".
• 2 აგვისტოს კი რუსეთის თავდაცვამ თქვა, რომ მათი პასუხისმგებლობის ზონაში, ბოლო 24 საათის განმავლობაში, აზერბაიჯანიმა ცეცხლის შეწყვეტის რეჟიმი 3-ჯერ დაარღვია.
• 3 აგვისტოს ბაქომ სომხეთი დაადანაშაულა სამმხრივი შეთანხმების დარღვევაში — მათ აღნიშნეს, რომ მთელი პასუხისმგებლობა "აზერბაიჯანის ტერიტორიაზე მომხდარ ინციდენტზე ეკისრება სომხეთს".

ბოლო მონაცემები: აზერბაიჯანის თავდაცვის სამინისტრო წერს, რომ მათი ჯარისკაცის სიკვდილის გამო, სომხეთის წინააღმდეგ ოპერაცია "შურისძიება" წარმატებით განახორციელეს და კონტროლის ქვეშ აიღეს გირხგიზის, სარიბაბას და სხვა დომინანტური სიმაღლეები ყარაბაღის ქედის გასწვრივ.

• მთიანი ყარაბაღის "თავდაცვის არმია" ამბობს, 4 აგვისტოს ღამით ვითარება შედარებით სტაბილური იყო.
• თუმცა სომხეთის პრემიერმინისტრის, ნიკოლ ფაშინიანის განცხადებით, კონტაქტის ხაზზე ამ დროისთვის საომარი მოქმედებების არარსებობის მიუხედავად, ვითარება უკიდურესად დაძაბულია.

მსხვერპლი: აზატუტიუნის ინფორმაციით, ყარაბაღში დაჭრილი სომეხი ჯარისკაცების რაოდენობამ 19-ს მიაღწია, ერთის მდგომარეობა უკიდურესად მძიმეა

• მთიანი ყარაბაღის "თავდაცვის არმიის" განცხადებით კი, 3 აგვისტოს მათ შემადგენლობაში 2 სამხედრო დაიღუპა და 14 დაიჭრა.
• ღია წყაროებიდან ამ ეტაპზე ცნობილია მხოლოდ 1 აზერბაიჯანელი ჯარისკაცის დაღუპვის შესახებ.

საერთაშორისო გამოხმაურება: შეტაკებების შესახებ ცნობების გავრცელების შემდეგ, პირველ აგვისტოს აშშ-ის სახელმწიფო მდივნის თანაშემწემ ევროპისა და ევრაზიის საკითხებში, კარენ დონფრიდმა სატელეფონო საუბარი გამართა სომხეთისა და აზერბაიჯანის საგარეო საქმეთა მინისტრებთან.

• 3 აგვისტოს ევროკავშირმა მოუწოდა მხარეებს, დაუყოვნებლივ შეწყვიტონ საომარი მოქმედებები — მათი თქმით, აუცილებელია დეესკალაცია, ცეცხლის შეწყვეტის შეთახნმების პატივისცემა და მოლაპარაკების მაგიდასთან დაბრუნება.

• შეერთებული შტატები ღრმად შეშფოთებულია და ყურადღებით ადევნებს თვალს ინტენსიური ბრძოლების შესახებ ცნობებს — მოუწოდებენ, გადაიდგას სასწრაფო ნაბიჯები დაძაბულობის შესამცირებლად და ესკალაციის თავიდან ასაცილებლად.

• ასევე, ეუთომ მოუწოდა სომხეთსა და აზერბაიჯანს, მიიღონ ყველა საჭირო ზომა დეესკალაციისა და დიალოგის განახლებისთვის.
• მომხდარს გამოეხმაურა სამხედრო გაერთიანება ОДКБ-ც და მოუწოდა კონფლიქტის მხარეებს, თავი შეიკავონ ძალის გამოყენებისგან და ისარგებლონ მხოლოდ დიპლომატიური მეთოდებით.