ინფორმაცია საქართველოს კულტურის, სპორტისა და ახალგაზრდობის სამინისტრომ Facebook-გვერდზე გაავრცელა.

რატომ არის მნიშვნელოვანი: წულუკიანის მინისტრად დანიშვნის შემდეგ, 2015 წლიდან მოქმედი ლიტერატურული პრემიის ლიტერას ჟიურის ერთ-ერთი წევრი სამინისტრომ დანიშნა.

  • საბოლოოდ, მწერალთა სახლმა ლიტერატურული კონკურსის ჩაშლის შესახებ განაცხადა. თუმცა, ლიტერა მაინც ჩატარდა, ოღონდ სხვა ფორმით და, შესაბამისად, თავისუფალი ლიტერა ეწოდა;
  • ამას არც წულუკიანი დარჩა ვალში და ახალი ლიტერატურული პრემია, "წლის საუკეთესო" დააანონსა.

დეტალები: წულუკიანის განცხადებით, ახალი ლიტერატურული კონკურსი, რომელიც ქალებსა და ქალ მწერლებს ეძღვნება და ანა კალანდაძის სახელს უკავშირდება, ყოველწლიურად, ივლისის თვეში გამოცხადდება.

  • მისი თქმით, კონკურსის ძირითადი მიზანი ქალი ავტორების ხელშეწყობა, წარმოჩენა და წახალისება იქნება;
  • "ამასთან, ერთი ნომინაცია შეეხება როგორც ქალ, ისე კაც ავტორებს და გაიცემა ნაწარმოებისთვის, რომელიც ქალის თემას ეძღვნება", — აღნიშნულია განცხადებაში.

კონკურსში მონაწილეობის უფლება აქვთ საქართველოში რეგისტრირებულ კერძო სამართლის იურიდიულ და საქართველოს მოქალაქე ფიზიკურ პირებს.

  • კონკურსის ფარგლებში განიხილება კონკურსის გამოცხადების წინა წელს წიგნად გამოცემული თანამედროვე ქალი ავტორის/ების ქართულენოვანი ან/და ქართულ ენაზე თარგმნილი უცხო ენაზე შექმნილი ლიტერატურული ნაწარმოებები.

პრემიის ოდენობა 5 000 ლარი იქნება და გამარჯვებულებს სამინისტრო სიგელსაც გადასცემს. ისინი რამდენიმე ნომინაციაში გამოვლინდებიან:

  • მათ შორის, ქალი პროზაიკოსი — საუკეთესო პროზაული კრებულისთვის;
  • ქალი პოეტი — საუკეთესო პოეტური კრებულისთვის;
  • ქალი მთარგმნელი - საუკეთესო თარგმანისთვის;
  • ქალის თემაზე შექმნილი საუკეთესო ნაწარმოების ავტორი.