უწყება აცხადებს, რომ თეა კატუკიას ბრალდებებით "გაკვირვებული" არიან და ამას "ცილისმწამებლურს" უწოდებენ.

რატომ არის მნიშვნელოვანი: დღეს თეა კატუკიამ თანამდებობის დატოვების შესახებ განცხადება გაავრცელა და საგარეო საქმეთა სამინისტროს მხრიდან ზეწოლაზე ისაუბრა.

  • "ვერასოდეს წარმოვიდგენდი, რომ ფუნქციის შესრულება მომიწევდა მუდმივი შეურაცხყოფის, ცილისწამების, ზეწოლის, შევიწროებისა და მუქარის კონტექსტში".

დეტალები: უწყების თქმით, ელჩმა თანამდებობა წინასწარი კონსულტაციის საფუძველზე დატოვა, რა დროსაც კატუკიას განუმარტეს, რომ საფრანგეთში ელჩად ყოფნის პერიოდში მისი საქმიანობით უწყება "კმაყოფილი არ იყო".

  • "სამწუხაროდ, მან ვერ უზრუნველყო მასზე დაკისრებული უფლება-მოვალეობების ჯეროვნად შესრულება და ევროპის ამ უმნიშვნელოვანეს ქვეყანაში, საქართველოს ინტერესების სათანადოდ დაცვა"
  • "შესაბამისად, უწყებამ ქ-ნ თეასთან კონსულტაციის საფუძველზე მიზანშეწონილად ჩათვალა აღნიშნული პოზიციიდან მისი გამოწვევა".

უწყება ამბობს, რომ საფრანგეთთან საქართველოს ურთიერთობები უმნიშვნელოვანეს ეტაპზე გადავიდა, რაც საელჩოში ხელმძღვანელ პოზიციაზე "მაღალი კვალიფიკაციისა და გამოცდილების მქონე დიპლომატის მივლინებას" მოითხოვს.

რას ამბობს კატუკია: ყოფილმა ელჩმა იმ სტრუქტურულ დარღვევებზე ისაუბრა, რასაც მისი თქმით, პოსტზე დანიშვნის შემდეგ აწყდებოდა.

  • "არ მიფიქრია, რომ საქართველოს მთავრობისთვის მიუღებელი აღმოჩნდებოდა საზღვარგარეთ ჩემი განვლილი პროფესიული გზა და ჩემი პოლიტიკური მიუკერძოებლობა";
  • მისი თქმით, ეს დარღვევები მნიშვნელოვან ზიანს აყენებს საფრანგეთში საქართველოს წარმომადგენლობის ინტერესებსა და იმიჯს.