მარიუპოლის მერის მრჩეველის, პეტრო ანდრიუშენკოს განცხადებით, სამარხში 100-ზე მეტი ადამიანის ცხედარი იპოვეს.

რატომ არის მნიშვნელოვანი: მარიუპოლს ამ დროისთვის რუსეთი აკონტროლებს და უცბობია რამდენი ადამიანია დაღუპული.

  • მარიუპოლში 1 300 მაღალსართულიანი შენობა განადგურდა, დანგრეული სახლის ქვეშ დაიღუპა 50-დან 100-მდე ადამიანი.
  • ქალაქში უკვე აღმოჩენილია არაერთი მასობრივი საფლავი.

დეტალები: ანდრიუშენკო წერს, რომ ცხედრების გადასვენებებზე საუბარი ჯერ კიდევ არ მიმდინარეობს — "ხალხი ფაქტობრივად სამარხებში აგრძელებს ცხოვრებას".

  • ანდრიუშენკო საუბრობს, რომ მარიუპოლში ფაქტობრივად შეჩერებულია ექსჰუმაციაც.
  • "საოკუპაციო ხელისუფლება იმდენად არის გატაცებული აღდგენის სურათის შექმნით, რომ დაკრძალვისთვის არ სცალიათ. ქუჩაში მოწყობილი დროებითი საფლავები ნელ-ნელა მუდმივად იქცევა".
  • ქალაქის მერი ამბობს, რომ მოსახლეობა იძულებულია საკვებისთვის მტრედებზე ინადიროს.

უკრაინაში შეჭრის შემდეგ, რუსეთმა ომის დანაშაული არაერთხელ ჩაიდინა. მათ შორის, ყველაზე გახმაურებული ბუჩა და მარიუპოლი იყო.

  • 31 მაისის მონაცემებით, უკრაინა ოკუპანტების მიერ ჩადენილი ომის დანაშაულის 14 000-ზე მეტ საქმეს იძიებს.
  • 8 ივნისს ვოლოდიმირ ზელენსკიმ განაცხადა, რომ უკრაინაში "მწამებელთა წიგნი" ამოქმედდება, რომელშიც ომის დამნაშაულები იქნება დოკუმენტირებული.
  • Amnesty International-მა რუსეთის მიერ მარიუპოლის დრამატული თეატრის დაბომბვა ომის დანაშაულად აღიარა.