გუშინ, 30 ივნისს ისრაელის 24-ე მოწვევის ქნესეთმა მხარი დაუჭირა დაშლას და მომდევნო არჩევნების 2022 წლის პირველ ნოემბერს დანიშვნას.

რატომ არის მნიშვნელოვანი: ეს იქნება ქნესეთის მეხუთე არჩევნები ბოლო სამნახევარი წლის განმავლობაში.

  • ახალი არჩევნების დანიშვნას 92 მომხრე ჰყავდა, წინააღმდეგი კი არავინ ყოფილა.

დეტალები: იქიდან გამომდინარე, რომ ნაფთალი ბენეტმა პრემიერმინისტრის თანამდებობდა დატოვა, ამ პოზიციას იაირ ლაფიდი დაიკავებს.

  • ლაფიდი თანამდებობაზე არჩევნების ჩატარებამდე და ახალი კოალიციის შექმნამდე დარჩება.

  • ბენეტი ტოვებს პარტიასაც და მომდევნო არჩევნებში მონაწილეობის მიღებას აღარ აპირებს.

  • არჩევნებზე ლაფიდის მთავარი კონკურენტი კვლავ ყოფილი პრემიერმინისტრი, ბენიამინ ნეთანიაჰუ იქნება, რომელიც ისრაელის ისტორიაში ამ თანამდებობას ყველაზე დიდი ხნით იკავებდა.

არქივიდან: გასული წლის 3 ივნისს ახალი მთავრობის ჩამოყალიბებისა და ნეთანიაჰუს 12-წლიანი პრემიერმინისტრობის დასასრულებლად ისრაელის ოპოზიციურმა პარტიებმა შეთანხმებას მიაღწიეს.

  • სწორედ ამ დროს დაინიშნა პრემიერმინისტრად ნაფთალი ბენეტი.