რომის პაპის, ფრანცისკეს განცხადებით, ძირითადი საკვები ომის იარაღად არ უნდა იყოს გამოყენებული და რუსეთს უკრაინიდან ხორბლის ექსპორტზე ბლოკადის მოხსნისკენ მოუწოდა.

"მილიონობით ადამიანის სიცოცხლე ხორბლის ექსპორტზეა დამოკიდებული, განსაკუთრებით ღარიბ ქვეყნებში. მე გულწრფელად მოგმართავთ, რომ ყველაფერი იღონოთ ამ საკითხის გადასაჭრელად, რომ ადამიანის საყოველთაო უფლებები უზრუნველყოფილი იყოს. გთხოვთ, არ გამოიყენოთ ხორბალი, ძირითადი საკვები, როგორც ომის იარაღი", — აცხადებს პაპი.

უკრაინის პრეზიდენტის, ვოლოდიმირ ზელენსკის განცხადებით, 22 მილიონი ტონა მარცვლეული, რაც უკრაინის მარცვლეულის ექსპორტის თითქმის ნახევარს შეადგენს, რუსეთის მიერ ძირითადი საექსპორტო მარშუტების ბლოკადით შეჩერებულია.

რომის პაპმა, ფრანცისკემ 3 მაისს განაცხადა, რომ მან რუსეთის პრეზიდენტს, ვლადიმერ პუტინთან მოსკოვში შეხვედრის სურვილი გამოთქვა, თუმცა მისგან პასუხი ვერ მიიღო.