გარემოს დაცვისა და სოფლის მეურნეობის სამინისტროს განცხადებით, ქვეყანაში ხორბლის იმპორტი დიდწილად ფქვილის იმპორტმა ჩაანაცვლა, იაფი ფქვილის მარაგების ფონზე კი ავტომატუად შემცირებულია ხორბლის იმპორტი, ხორბლის მარაგები.

უწყების თქმით, საქართველოში ხორბლის ფქვილის დეფიციტის შექმნის საფუძველი არ არსებობს, რადგან მარაგი დღეისთვის საკმარისზე მეტია, თუმცა არა ხორბლის, არამედ ფქვილის სახით.

"დაახლოებით თვენახევარ, ორ თვეში დაიწყება ხორბლის ადგილობრივი მოსავლის აღება. ივლისი-აგვისტო მსოფლიოში მარცვლეული კულტურების ახალი მოსავლის მიღების სეზონია. ახალი მოსავალი ახალი საფასო პოლიტიკის შემუშავებას განაპირობებს. დღეისათვის, ხორბლის ფასები მკვეთრადაა გაზრდილი, პრაქტიკულად გაორმაგებულია. იმედი გვაქვს, რომ ფასების კლების ტენდენცია დაიწყება. შესაბამისად, უკვე ამ პერიოდისთვის, საქართველოს მთავრობა შექმნილი ვითარების შესაბამისად იმოქმედებს", — აღნიშნულია სამინისტროს განცხადებაში.

დღეს, 13 მაისს ინტერპრესნიუსმა გაავრცელა საქართველოს ხორბლისა და ფქვილის მწარმოებელთა ასოციაციის აღმასრულებელი დირექტორის, ლევან სილაგავას კომენტარი, სადაც ის ამბობდა, რომ ქვეყანაში ხორბლის მარაგი ამოწურულია და უახლოეს დღეებში ყველა წისქვილი გაჩერდება.