ტრადიციულად რუსეთში 9 მაისს ნაციზმზე გამარჯვების დღე აღნიშნეს და აღლუმთან ერთად თემატური კონცერტებიც გაიმართა.

ამ ქვეყნის ზოგადი გამოცდილებიდან გამომდინარე, მოულოდნელი არ იყო ის, რომ ამ პროცესსაც ლაფსუსისა და კომიკური შედეგის გარეშე არ ჩაუვლია: გამარჯვების დღისთვის მიძღვნილ კონცერტზე, რომელიც რუსულ პირველ არხზე გადაიცემოდა, მეორე მსოფლიო ომში მონაწილე საბჭოთა წყვილებს შორის ბონის და კლაიდის ფოტო აჩვენეს.

კონცერტის განმავლობაში ფონად საბჭოთა კავშირში მცხოვრები იმ წყვილების ფოტოები გაუშვეს, რომლებიც ომმა დააშორა, თუმცა მათ შორის როგორღაც ამერიკელი კრიმინალი წყვილი — ბონი და კლაიდი აღმოჩნდა.

რუსული პირველი არხის ვებგვერდზე მოგვიანებით კონცერტის ისეთი ჩანაწერი აიტვირთა, რომელშიც ეს სცენა ამოჭრილია, თუმცა ინტერნეტში თავდაპირველი კადრები მაინც გავრცელდა:

ბონის და კლაიდის სახელით ცნობილია 1930-იანების აშშ-ში ერთ-ერთი ყველაზე საშიში წყვილი, რომელიც დიდი დეპრესიის დროს ბანკებს აყაჩაღებდა, მაღაზიებს ძარცვავდა და ხალხს იტაცებდა. წყვილის შესახებ ართურ პენმა 1967 წელს ფილმი გადაიღო, რამაც მათი ისტორია კიდევ უფრო პოპულარული გახადა.

ფოტო, რომელიც 9 მაისს რუსეთში გამართულ გამარჯვების დღის კონცერტზე გამოიყენეს, 1932 წლიდან 1934 წლამდე პერიოდშია გადაღებული და მათ უკანასკნელ სურათად ითვლება: 1934 წელს წყვილი მოკლეს.

ფოტო: Public Domain