პრემიერმინისტრის, ირაკლი ღარიბაშვილის განცხადებით, პოეტი რეზო ამაშუკელის პოეზია ქართული ლიტერატურის უმნიშვნელოვანესი შენაძენია, ამაშუკელი კი თავისი ქვეყნის საუკეთესო მოქალაქე იყო.

"ძალიან დამწყვიტა გული თვალსაჩინო პოეტის რეზო ამაშუკელის გარდაცვალებამ.

სამშობლოსა და ადამიანის სიყვარულით აღსავსე, განუმეორებელი ხელწერით შექმნილი მისი პოეზია ჩვენი ლიტერატურის უმნიშვნელოვანესი შენაძენია. ამავე დროს იგი იყო თავისი ქვეყნის საუკეთესო მოქალაქე. ჯერ კიდევ საბჭოთა ეპოქიდან მოყოლებული, სიცოცხლის ბოლო წუთამდე, ბატონი რეზოს უკომპრომისო საზოგადოებრივი პოზიცია სამაგალითოა ყველა ჩვენგანისთვის.

ამ მძიმე წუთებში თანადგომას და გულწრფელ სამძიმარს ვუცხადებ ბატონი რეზოს ოჯახს და მთელ საქართველოს", — ამბობს პრემიერმინისტრი.

ქართველი პოეტი რეზო ამაშუკელი 85 წლის ასაკში გარდაიცვალა.

ამის შესახებ ინფორმაცია On.ge-ის მწერალთა კავშირში დაუდასტურეს.

რეზო ამაშუკელი 1936 წელს ქუთაისში დაიბადა. 1960 წელს მან დაამთავრა თსუ-ის ფილოლოგიის ფაკულტეტი, 1957 წლიდან კი აქტიურად იბეჭდებოდა მისი ლექსები და პოემები.