პრემიერმინისტრი ირაკლი ღარიბაშვილი სახელმწიფო ინსპექტორს, ლონდა თოლორაიას "მთავრობის ნებისმიერ სტრუქტურაში" დასაქმებას სთავაზობს. მისი თქმით, თუ თოლორაიას სახელმწიფო ინსპექტორის სამსახურის გაყოფის შემდეგ ჩამოყალიბებულ ორ სტრუქტურის ხელმძღვანელის შესარჩევ კონკურსში არ მოუნდება მონაწილება, სხვა "ყველა კარი აქვს ღია".

"მე შემიძლია საჯარო შეთავაზებაც გავუკეთო ქალბატონ ლონდას, მთავრობის ნებისმიერ სტრუქტურაში ... ვიცი, რომ იგი არის ძალიან კვალიფიციური, ძალიან გამოცდილი კადრი. მანამდე მუშაობდა, თუ არ ვცდები, პროკურატურაში, წლების განმავლობაში, შემდეგ პოლიციაში. ჩვენ სიამოვნებით, თუ მას აღარ მოუნდება, ან ერთ, ან მეორე სამსახურის კონკურსში მიიღოს მონაწილეობა, მას ყველა კარი აქვს ღია და მე პირადად აქედან ვუკეთებ შეთავაზებას. ასე რომ, პიროვნული, ამ შემთხვევაში, უნდა გამოირიცხოს", — განაცხადა ღარიბაშვილმა იმედის ეთერში.

პრემიერმინისტრი ამტკიცებს, რომ ქართული ოცნების ინიციატივა — ინსპექტორის სამსახურის გაყოფა და მის ნაცვლად ორი უწყების შემქნა გააჯანსაღებს და გააძლიერებს სფეროს.

"ესა თუ ის რეფორმა ემსახურება გაჯანსაღებას, გაძლიერებას სამსახურის და მით უმეტეს, იდეაში, მე ეს, რა თქმა უნდა, ვიცი ძალიან კარგად, დაგეგმილია ამ სამსახურის გარდაქმნა, გაყოფა ორ სამსახურად და მისი კიდევ უფრო მეტად გაძლიერება. კიდევ უფრო მეტი დამოუკიდებლობა რომ ჰქონდეს, მეტი ტრანსფარენტულობა, მეტი უფლებები და მე მგონი, ეს ყველაფერი კარგია. პერსონალური ცალკე გამოიყოფა — ჩვენ არ ვაუქმებთ, ბუნებრივია და ცალკე იქნება საგამოძიებო სამსახური, კიდევ უფრო ძლიერი, კიდევ უფრო მეტი უფლებებით", — განაცხადა ღარიბაშვილმა.

იგი შეეხო კანონპროექტის დაჩქარებული წესით განხილვასაც და ფაქტობრივად დაადასტურა, რომ პარლამენტი ცდილობს საშემოდგომო სესიაზე გადაწყვიტოს საკითხი.

"დეტალებში არ მინდა შევიდე, პარლამენტს თავისი გეგმა, გრაფიკი და დღის წესრიგი აქვს. მე ვიცი, რომ თვის ბოლომდე პარლამენტი ცდილობს, ყველა მიმდინარე საკითხი დახუროს, შემდეგ, მოგეხსენებათ, არის არდადეგები, ვიდრე გაიხსნება საგაზაფხულო სესია. ალბათ, აქედან გამომდინარე არის ნაკარნახევი, დავარქვათ სიჩქარე. თუმცა, მე ამას სიჩქარეს ვერ დავარქმევდი", — ამბობს ღარიბაშვილი.

ქართულ ოცნებას სახელმწიფო ინსპექტორის სამსახურის გაუქმება და მის ბაზაზე ორი ახალი უწყების — სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნა სურს. შესაბამისი კანონპროექტი უკვე მომზადებული და ინიცირებულია.

აღსანიშნავია, რომ პერსონალურ მონაცემთა დაცვის სამსახური აქამდეც არსებობდა. სწორედ მისი გაუქმების შემდეგ, 2019 წლიდან ამოქმედდა სახელმწიფო ინსპექტორის სამსახური და სხვა ფუნქციებიც შეითავსა.

ლონდა თოლორაიამ სპეციალურად გამართულ ბრიფინგზე მმართველი პარტიის დეპუტატების მიერ ინიცირებული კანონპროექტი დამოუკიდებელი სამსახურის "დასჯად" შეაფასა.

გაიგე მეტი:

• შსს-ს დედამიწის ზურგზე ყველაფრის უფლება აქვს, ამას დისკომფორტი არ შეუქმნია პარლამენტისთვის — თოლორაია
• შეწყდეს საკითხის დაჩქარებულად განხილვა, ყველას მიეცეს არგუმენტებს წარდგენის შესაძლებლობა — პრეზიდენტი ინსპექტორზე
• ეცადათ ჩვენთან კონსულტაცია, იქნებ ლონდა თოლორაიასთვისაც მისაღები იყო ამ სამსახურის დახვეწა — ინსპექტორი