ქართული ოცნების თავმჯდომარე, ირაკლი კობახიძე ამტკიცებს, რომ ქვეყანაში "არავითარი კრიზისი" არაა და ნაციონალური მოძრაობის მიერ ორგანიზებული მასობრივი შიმშილობის აქცია საზოგადოებისთვისაც კი ღიმილისმომგვრელია. მისივე თქმით, შიმშილობას მიზეზი არ აქვს, ამიტომ პროტესტს სიმყარეც ვერ იქნება.

"დღეს არავითარი კრიზისი არ არის, დღეს ხალხი ძალიან მშვიდად უყურებს მოვლენებს, რომლებიც ვითარდება. ყველა ხედავს, საზოგადოება ხედავს, რომ ოპოზიციას არც ბუნებრივი და არც ხელოვნური კრიზისის შეცვლის საშუალება არ აქვს. ის ე.წ. შიმშილობაც კი, რომელიც გამოცხადდა, ისიც არის ღიმილისმომგვრელი საზოგადოებისთვის, იმიტომ, რომ ყველამ ყველაფერი იცის აბსოლუტურად. არავითარი მიზეზი არ აქვს შიმშილობას და შესაბამისად, სიმყარეც ვერ ექნება", — განაცხადა კობახიძემ იმედის ეთერში.

კობახიძე ამბობს, რომ ქართულ ოცნებას წარმატებები, ხოლო ნაციონალურ მოძრაობას მუდმივი წარუმატებლობები აქვს, ამის მიზეზი კი ისაა, რომ პარტია ერთიანი არ არის. კობახიძე ირწმუნება, რომ ენმ-ში შიდა დაპირისპირებაა.

"არის შიდა კონფლიქტები, სააკაშვილი, მელია, იქ მერაბიშვილი და ა.შ. ყველამ იცის უკვე ეს ისტორია, მათ აქვთ სერიოზული დაპირისპირება და ეს დაპირისპირება მუდმივად იჩენს თავს. მათ შორის, ამ დაპირისპირების შედეგია ის, რომ ისინი ვერასდროს ვერ აღწევენ წარმატებას. ანუ, მთავარი ინდიკატორი იმისა, რომ ჩვენ ვართ ერთიანი და ისინი არა, არის სწორეს ის, რომ ჩვენ გვაქვს წარმატებები და მათ აქვთ მუდმივი წარუმატებლობა", — თქვა მან.

21 დეკემბერს მიხეილ სააკაშვილის მხარდამჭერ აქციაზე ნაციონალური მოძრაობის თავმჯდომარემ, ნიკა მელია მასობრივი შიმშილობა გამოაცხადა. მელიას ინფორმაციით, სააკაშვილის გათავისუფლების მოთხოვნით 300-მდე ადამიანმა დაიწყო შიმშილობა. 22 დეკემბერს, ნაციონალური მოძრაობის ერთ-ერთმა ლიდერმა, კობა ნაყოფიამ განაცხადა, რომ მოშიმშილეთა სიაში 180 ადამიანია დარეგისტრირებული, თუმცა ვარაუდობს, რომ ეს რიცხვი გაიზრდება.

აქტივისტები კახეთის გზატკეცილზე, ნაციონალური მოძრაობის ოფისის ეზოში განლაგებულ კარვებში შიმშილობენ.

გაიგე მეტი: