საკლუბო სექტორის წარმომადგენლების განცხადებით, წინა კვირიდან ამ კვირისთვის გადადებული ღონისძიებები ჩატარდება და იმ შემთხვევაში რომელიმე კლუბს დალუქავენ ან სისხლის სამართლის პასუხისგებაში მისცემენ, პროტესტის მწვავე პროტესტს მიმართავენ.

"საქართველოში ყველაზე დაცული სივრცის იდეით ვართ მისულები და საერთოდ მწვანე პასპორტი რომ არსებობს პირველად ეს საკლუბო ინდუსტრიის წარმომადგენლებმა გავაჟღერეთ. საბოლოოდ მათ ეს მწვანე პასპორტი მიიღეს, მაგრამ ჩვენ გადაგვაგდეს, რასაც შეიძლება ეწოდოს, რომ ეს არის მიზანმიმართული ბრძოლა. წინა კვირიდან ამ კვირისთვის გადადებული ღონისძიებები ჩატარდება, ჩვენ ვაგრძელებთ ღონისძიებების ჩატარებას", — აცხადებენ ისინი.

საკლუბო ინდუსტრიის წარმომადგენლებს თქმით, მათ ფინანსური ვალდებულებები აქვთ აღებული, რომლითაც ივენთები დაიწყეს. ამიტომ, აცხადებენ, რომ ამ ეტაპზე დაანონსებული ყველა ივენთი ჩატარდება.

"იმ შემთხვევაში, თუ ყველა ან რომელიმე venue იქნება დალუქული ან სისხლის სამართლებრივ პასუხისგებაში მიცემული, მთელი საკლუბო სცენა ერთიანი იქნება და მივამრთავთ მწვავე პროტესტის ფორმას, სავარაუდოდ დიდი აქციები იქნება", — აცხადებენ კლუბების წარმომადგენლები.

დღეს, 22 დეკემბერს საკოორდინაციო საბჭოს სხდომის შემდეგ ოპერაციული შტაბის უფროსმა, გიორგი ღიბრაძემ განაცხადა, რომ კლუბების გახსნასთან დაკავშირებით გადაწყვეტილება არ მიუღიათ. ღიბრაძე ამას საქართველოში კორონავირუსის ომიკრონის შტამის დაფიქსირებით ხსნის.

მისივე თქმით, შრომის ინსპექციამ ის ღონისძიებები განახორციელა, რაც კანონმდებლობით აქვს განსაზღვრული და არასწორია ინფორმაცია იმის შესახებ, რომ ინსპექციას რეაგირებები არ მოუხდენია.

17 დეკემბერს, ღამის კლუბების გახსნამდე რამდენიმე საათით ადრე, შრომის ინსპექციამ გაავრცელა განცხადება, რომ კლუბებში ღონსიძიებების გამართვა ამ ეტაპზე აკრძალულია. მათივე განმარტებით, მიმდინარეობს მუშაობა ე.წ. ღამის კლუბების უსაფრთხოების პროტოკოლის პროექტის შემუშავებაზე, რომელიც უწყებათაშორის საკოორდინაციო საბჭოს წარედგინება და მიღებული იქნება შესაბამისი გადაწყვეტილება.

საპასუხოდ, კლუბების წარმომადგენლები ამბობდნენ, რომ გახნის შესახებ მთავრობამ იცოდა და ღონისძიებებს ჩაატარებდნენ. პარასკევს კლუბები მართლაც გაიხსნა და შრომის ინსპექციის შესვლის შესახებ ინფორმაცია არ გავრცელებულა.

მეორე დღეს, 18 დეკემბერს თბილისის ღამის კლუბებმა განაცხადეს, რომ შრომის ინსპექციასთან შეხვედრის შემდეგ დაგეგმილი ღონისძიებების ერთი კვირით გადადებაზე შეთანხმდნენ. მათი თქმით, ეს ბოლო კომპრომისია.

19 დეკემბერს, შეხვედრის შესახებ გავრცელებულ ინფორმაციაში კი შრომის ინსპექცია წერდა, რომ გადაწყვეტილებას "კლუბების ფუნქციონირების აღდგენის შესაძლებლობასთან დაკავშირებით" საკოორდინაციო საბჭო ერთობლივი განხილვების შემდეგ მიიღებს. მათივე ინფორმაციით, საბოლოო გადაწყვეტილება მიღებული იქნება ყველა შესაძლო რისკის, განსაკუთრებით ახალი, ომიკრონ შტამის სწრაფი გავრცელების შესაძლებლობის და შესაბამისი უსაფრთხოების ზომების მაქსიმალური უზრუნველყოფის განსაზღვრის შედეგად.

მწვანე პასპორტების ამოქმედების მიუხედავად, კლუბების მუშაობა ჯერ დაშვებული არ არის. 4 დეკემბერს შრომის ინსპექციამ კლუბი ხიდი 10 000 ლარით დააჯარიმა და დალუქა. კლუბის წარმომადგენლებმა "ესკალაციის თავიდან აცილების მიზნით", ტერიტორია დატოვეს, თუმცა პასუხისმგებელ პირებს "გონივრული ვადა" მისცეს, რათა მათი მუშაობა დაუშვან.