მოპედების მძღოლებს მოპედების რეგისტრაცია და ახალი ტიპის — AM კატეგორიის მართის მოწმობის აღება მოუწევთ. მოპედების რეგისტრაცია ნებაყოფლობითი 2022 წლის პირველ მარტამდე იქნება, ხოლო 2022 წლის პირველი მარტიდან სავალდებულო.

კანონპროექტის თანხმად, მოპედები მექანიკურ სატრანსპორტო საშუალებებს უთანაბრდება და მათზე გავრცელდება იგივე მოთხოვნები, რაც ნებისმიერ მექანიკური სატრანსპორტო საშუალებისთვის არის დადგენილია.

საქართველოს მთავრობის მიერ საკანონმდებლო ინიციატივის წესით წარმოდგენილი კანონპროექტი საგზაო მოძრაობის შესახებ საქართველოს კანონში ცვლილების შეტანის თაობაზე კანონპროექტი იურიდიულ საკითხთა კომიტეტმა მეორე მოსმენისთვის განიხილა.

კიდევ ერთი ცვლილება, რასაც კანონპროექტი ითვალისწინებს ის არის, რომ სატრანსპორტო საშუალების მართვის უფლების მისაღები გამოცდის პრაქტიკული ნაწილი ორეტაპიანი გახდება.

შინაგან საქმეთა მინისტრის მოადგილის, ალექსანდრე დარახველიძის განმარტებით, ცვლილებების ერთ-ერთი ძირითადი მიმართულება ასოცირების დღის წესრიგით ნაკისრი ვალდებულებების იმპლემენტაციაა, რის შედეგადაც, საბოლოო ჯამში, ქართული მართვის მოწმობის ევროპული ქვეყნების მართვის მოწმობებში გადაცვლა იქნება შესაძლებელი.

კანონპროექტის ავტორი შინაგან საქმეთა სამინისტროა და ის წინა მოწვევის პარლამენტში 2019 წელს დაინიცირდა.