მიტროპოლიტმა ნიკოლოზ ფაჩუაშვილმა, განაცხადა, რომ არ მოსწონს იმ ბერის საქციელი, რომელმაც ჟურნალისტს აგინა, თუმცა ამის ფონზე სცადა მომხდარში დამნაშავედ ჟურნალისტი წარმოეჩინა. მეუფე, რომლის ეპარქიაშიც მსახურობს ეს ბერი, ამტკიცებს, რომ ჟურნალისტმა ის "მდგომარეობიდან გამოიყვანა".

ნიკოლოზის აზრით, მედიამ კანონი დაარღვია, როცა მასთან შეთანხმების გარეშე მონასტერში ავიდა და ბერის ჩაწერა სცადა. არგუმენტად მას საპატრიარქოს განცხადება მოჰყავს იმის შესახებ, რომ მონასტრებში თვითნებურად შესვლა არ შეიძლება.

ახალციხის, კუმურდოსა და კარის მიტროპოლიტი ამბობს, რომ აღნიშნულ პირს ბევრად უფრო ცუდი ლექსიკა ჰქონდა და განდეგილად გაამწესა, რომ ხალხისთვის მოერიდებინა.

"მე ძალიან კარგად ვიცნობ ამ ადამიანს და ამ ადამიანმა წინასწარ გააფრთხილა ყველა და გაავრცელა. თქვენ ისიც არ გაინტერესებთ, ეს ადამიანი საიდან ამოვიყვანე მე. ეს მართლა ესეა. თქვენ არ იცით, რა ლექსიკა ჰქონდა ამ ადამიანს, როცა მე დავიწყე ეკლესიისკენ მისი მოყვანა", — განაცხადა მან ფორმულასთან ინტერვიუს დროს.

წამყვანმა აღნიშნა, რომ ბერის ლექსიკა დღეს ჭარბად მოისმინეს, რაზეც მიტროპოლიტი პასუხობს:

"არ მოგისმენიათ, არ მოგისმენიათ. ეს იმასთან შედარებით არ იყო... მომისმინეთ რას ვამბობ, გაიგონეთ რას ვამბობ. სანამ ჩემთან მოვიდოდა ეს ადამიანი და მე რომ დავიახლოვე, მისი ლექსიკა ბევრად უფრო მძიმე იყო და ბევრად უფრო ძლიერი ფსიქოლოგიური და ფსიქიკური ზიანი ჰქონდა ამ ადამიანს და მე ვცდილობ მის წამოყვანას".

ამის შემდეგ, მიტროპოლიტი ამბობდა, რომ ბერის საქციელი ცუდია, მაგრამ ნამდვილი დარღვევა ის ფაქტია, რომ მედიამ მისი საქციელი არ დამალა და "ტირაჟირება გაუკეთა".

"თქვენი ჟურნალისტები, დღევანდელი, გუშინდელი, გუშნწინდელი მიდიან და სპეციალურად, აი, იმ საპატრიარქოს განცხადებაში რაც წერია, ცდილობენ, რომ ადამიანი მდგომარეობიდან გამოიყვანონ. ცუდი სიტყვების მოსმენა არავის არ სიამოვნებს, როგორ შემიძლია ვთქვა, რომ კარგია, რაც იმან ილაპარაკა. ყურს არ გაეგონება ეს ყველაფერი, ყურს არ გაეგონება. მაგრამ ადამიანს რომ გამოიყვან მდგომარებიდან და ამას მერე კიდე ტირაჟირებას გაუკეთებ და გაავრცელებ, ეს არის სწორედ კანონდარღვევა, რასაც თქვენ აკეთებთ. თორე ის ადამიანი ძალიან ცუდად მოიქცა, ორი აზრი არ არსებობს. მაგრამ მე როდესაც ის მოვიყვანე მონასტერში, მარტო დავასახლე სპეციალურად, რომ ადამიანებთან არ ჰქონოდა შეხება. რა გავაკეთო მეტი, გამაგებინეთ, განდეგილია ადამიანი, მარტო ცხოვრობს.", — აცხადებს ფაჩუაშვილი.

მიტროპოლიტი ამტკიცებს, რომ მომხდარზე ყველას შესაბამის პასუხისმგებლობას დააკისრებს, მაგრამ მაშინ, როცა ყველაფერში გაერკვევა, რადგან ტელევიზიით ნანახზე რეაგირებას ვერ მოახდენს. ინტერვიუს დროს ის ხაზს უსვამდა, რომ მედიამ ამბის მხოლოდ ნაწილი გააშუქა, რაზედაც არაერთხელ უპასუხეს, რომ ასე არ ყოფილა და შავი კადრების ნახვა შესთავაზეს.

"[ბერმა] ძალიან ცუდი საქციელი ჩაიდინა. მე თუ მისი სული მაბარია, მისი სულის ცხონება, როგორ შეიძლება ის არ დავსაჯო, როგორ შეიძლება ძალიან მკაცრად არ მივუთითო და კიდევ არ ვიცი რა ღონისძებას ჩავატარებ. არ დამთავრებულა ეს ამბავი ხვალ, ზეგ და მაზეგ, ალბათ, ბევრი გამოჩნდება მსურველი, რომ ეს ბერი მწყობრიდან გამოიყვანოს", — ამბობს ის.

დღეს, 28 აგვისტოს, ტელეკომპანია ფორმულამ გაავრცელა კადრები, სადაც ჩანს, რომ სასულიერო პირმა ჟურნალისტს სიტყვიერი შეურაცხყოფა მიაყენა, დამამცირებელი და ჰომფობიური ტერმინებით მოიხსენია და აგინა. თალვკეთულას მონასტერში ჟურნალისტები იმის გასარკვევად ჩავიდნენ, მიმდინარეობს თუ არა მონასტერში უკანონო მშენებლობა, რამაც ბერის აგრესია გამოიწვია.

ჟურნალისტის რეპლიკას, რომ ჩაწერის უფლება აქვთ, სასულიერო პირი შეურაცხმყოფელი ფრაზებით პასუხობს:

"რაის უფლება გაქვთ, არაფრის უფლება არა გაქვთ. რა უფლება გაქვს? საიდან მოიგონე, რომ უფლება გაქვს. ჟურნალისტი კი არა, პირშისტი ხარ რა, გიყურებ. პირში არ აგიღია, ტო? წადი შენი, დედას დავეცი ახლა რა".

აღსანიშანავია, რომ 22 აგვისტოს დეკანოზმა ილია ჭიღლაძემ გაავრცელა ვიდეო, სადაც ჩანს, რომ ბერი იოანე კაცს შეურაცხყოფას აყენებს ჯგუფური გაუპატიურებით ემუქრება. 26 აგვისტოს კი სამხრეთის კარიბჭემ გაავრცელა აუდიოჩანაწერი, რომელშიც ბერი ამბობს, რომ "ძველი განგსტერია" და დაჭერის არ ეშინია. მისი თქმით, მონასტერში მიმდინარე მშენებლობაზე სააგენტოდან არაერთხელ გააფრთხილეს, მაგრამ საჭიროდ არ მიიჩნევს, რომ მათ რამე შეუთანხმოს.

ეს პირველი შემთხვევა არ არის, როდესაც სასულიერო პირები ჟურნალისტებისადმი აგრესიას ავლენენ და მათ შეურაცხყოფას აყენებენ. იმავეს აკეთებენ მაღალი იერარქიის სასულიერო პირებიც და ხშირად ახალისებენ ჟურნალისტებზე ფიზიკურ და სიტყვიერ თავდასხმებს.

სწორედ ეკლესიის და საპატრიარქო იყო თანაორგანიზატორი 5 ივლისის აქციისა, სადაც პრორუსულმა და ძალადობრივმა ჯგუფებმა ჟურნალისტებზე იძალადეს. შედეგად მედიის 53 წარმომადგენელი დაშავდა. რამდენიმე დღეში აქციაზე ნაცემი TV პირველი ოპერატორი, ლექსო ლაშქარავა გარდაიცვალა.