საქართველოს პრემიერმინისტრის, ირაკლი ღარიბაშვილის შეფასებით, რეგულაციების მოხსნამ გამოიწვია ეკონომიკური ზრდა. მისი თქმით, ორნიშნა ეკონომიკური ზრდა უპრეცედენტოა არა თუ რეგიონში, არამედ მთელს მსოფლიოში. ეს განცხადება ქობულეთის მერობის წარდგენისას გააკეთა.

"ჩვენ კარგად გვახსოვს მაგალითად, სულ რაღაც ორი-სამი წლის წინ იყო გამოწვევა, როდესაც რაღაც მოხდა, დესტაბილიზაციის მცდელობა იყო თბილისში, რამაც პირდაპირ შეწყვიტა ტურისტების ნაკადი, რომელიც შემდეგ აისახა თქვენს რეგიონზე [აჭარაზე], ამ ულამაზეს მხარეზე და ჩვენს მოსახლეობაზე საბოლოო ჯამში. გასულ წელს პანდემია იყო, რა თქმა უნდა, მე ვიცი, რომ ძალიან მძიმე იყო ეს პერიოდი. ქვეყანა ჩაკეტილი იყო, ტურისტები არ შემოდიოდნენ. და ზოგადად, დაკეტილი იყო მთელი სასტუმროები და ყველაფერი. მე ვიცი, რომ ძალიან გაუჭირდა ჩვენს ხალხს.

წელს ჩვენ ეტაპობრივად დავიწყეთ გახსნები, 6 თვის წინ, 5 თვის წინ. მოვხსენით რეგულაციები, რამაც წაახალისა ეკონომიკის ზრდა. ჩვენ გვაქვს უპრეცედენტო ზრდა რეგიონში, კი არა, მთელს მსოფლიოში. მე ვესაუბრე არაერთ ჩვენს კოლეგას, ვიცი რა ხდება ევროპაში, მსოფლიოში ზოგადად, როგორი ტენდენციებია. ასეთი ზრდა ჩვენს ქვეყანაში როგორიცაა, ორნიშნა ეკონომიკური ზრდა, არის მართლაც გამორჩეული", — თქვა ირაკლი ღარიბაშვილმა.

პრემიერმინისტრმა ეკონომიკურ ზრდაზე 14 აგვისტოსაც ისაუბრა და აღნიშნა, რომ ეკონომიკა დუღს და მუშაობს. ამავე შინაარსის განცხადება მან 9 აგვისტოსაც გააკეთა, სადაც ამბობდა, რომ ქვეყნის ეკონომიკის გაჯანსაღება შთამბეჭდავი ტემპებით მიმდინარეობს.

ოფიციალური სტატისტიკის მიხედვით, ივნისში საქართველოს ეკონომიკის წლიური ზრდა 18,7%, მაისში — 25,8%, ხოლო აპრილში — 44,8% იყო. შესაბამისად, მეორე კვარტალში ქვეყნის ეკონომიკა წლიურად 29,8%-ით გაიზარდა, პირველ კვარტალში კი 4,5%-იანი კლება დაფიქსირდა.

თუ გავითვალისწინებთ იმას, რომ პანდემიმადე საქართველოს ეკონომიკა საშუალოდ 5%-ით იზრდებოდა, მიმდინარე წლის მეორე კვარტალის ზრდის მაჩვენებელი მართლაც შთამბეჭდავად გამოიყურება, თუმცა გარდა ეკონომიკაში მიმდინარე ცვლილებებისა, გასათვალისწინებელია ის ტექნიკური ფაქტორებიც, რომელთა გამოც ეკონომიკური ზრდის ამგვარი მაჩვენებლები ფიქსირდება.

როგორც ცნობილია, მიმდინარე წლის მეორე კვარტალში ეკონომიკური ზრდის მსგავსი მონაცემები მნიშვნელოვნად გამოწვეულია ე.წ. საბაზისო ეფექტით, რადგან მიმდინარე წლის ეკონომიკური ზრდის მონაცემები 2020 წლის მძიმე ლოქდაუნის პერიოდს დარდება — შეგახსენებთ, რომ გასული წლის ივნისში საქართველოს ეკონომიკის წლიური ვარდნა 7,7%, მაისში — 13,5%, ხოლო აპრილში — 16,6% იყო.

რაც შეეხება ტურიზმს, ივლისში საქართველოში 230,9 ათასი უცხოური ვიზიტი განხორციელდა, რაც პანდემიური პერიოდის განმავლობაში ყველაზე მაღალი მაჩვენებელია. ამავე თვეში უცხოური ვიზიტების რაოდენობის წლიური ზრდა 403,7% იყო, თუმცა უნდა აღინიშნოს, რომ ტურიზმის მიმდინარე მაჩვენებლები ჯერ კიდევ მნიშვნელოვნად ჩამორჩება 2019 წლის მონაცემებს: 2021 წლის ივლისში, 2019 წლის იმავე თვესთან შედარებით, უცხოური ვიზიტების რაოდენობა 73,8%-ით არის შემცირებული.

გარდა ამისა, როგორც საზღვრის კვეთის მონაცემებიდან ხდება ცნობილი, 2021 წლის იანვარ-ივლისში საქართველოში სულ 695 ათასი უცხოური ვიზიტი განხორციელდა, რაც გასული წლის იმავე პერიოდის მაჩვენებელს 45,5%-ით, ხოლო 2019 წლის იანვარ-ივლისის მონაცემს 83%-ით ჩამორჩება.