ფინანსთა სამინისტროს საგამოძიებო სამსახურის განცხადებით, ჯგუფურად განხორციელებული, უკანონო სამეწარმეო საქმიანობის ფაქტი გამოვლინდა.

გამოძიების ვერსიით, დიდი ოდენობით შემოსავლების მიღების მიზნით, ზუგდიდში მდებარე, შესაბამისი ნებართვის არმქონე ერთ-ერთი აფთიაქიდან, სისტემატიურად გაიცემოდა მოქალაქეებზე ფსიქოტროპული და სპეციალურ კონტროლს დაქვემდებარებული მედიკამენტები, რეცეპტის გარეშე. უწყების შეფასებით, ბრალდებულები ხელს უწყობდნენ ე.წ. სააფთიაქო ნარკომანიას და საფრთხეს უქმნიდნენ ადამიანის სიცოცხლესა და ჯანმრთელობას.

საგამოძიებო სამსახურის ცნობით, სამართალდამცავებმა ბრალდებულების საცხოვრებლის ჩხრეკისას დიდი ოდენობით ფსიქოტროპული და სპეციალურ კონტროლს დაქვემდებარებული მედიკამენტები ამოიღეს.

საქმეზე გრძელდება გამოძიება საქართველოს სისხლის სამართლის კოდექსის 192-ე მუხლის მეორე ნაწილის ა ქვეპუნქტით. დანაშაული სასჯელის სახით, ითვალისწინებს თავისუფლების აღკვეთას 3 - დან 5 წლამდე ვადით.