გენერატორი 9.8-ს წარმომადგენლები აცხადებენ, რომ მხარდამჭრების დახმარებით, გენერატორის გადასარჩენ კამპანიას #SaveGenerator იწყებენ.

უკვე მიმდინარეობს ონლაინ Crowdfunding კამპანია, სადაც ყველა მსურველს შეუძლია განახორციელოს დონაცია.

მხარდამჭერ კამპანიაში ჩართულები არიან სხვადასხვა ორგანიზაციები, მუსიკოსები, კაფეები: ახალი მზიური, ქალთა მსვლელობა თბილისი, იოანე არაბული, შოთა ადამაშვილი, The Jetbird, Dudey, Old House Band, ზურა ბალანჩივაძე და სხვები.

კამპანიის ორგანიზატორები მოუწოდებენ ყველას, შეიტანონ მცირედი წვლილი გენერატორის გადარჩენაში.

გენერატორი 9.8 არის პირველი არაკომერციული, უფასო საერთო სამუშაო სივრცე (Coworking space) და სოციალური ბარი საქართველოში, რომელსაც სოციალური საწარმოს ფორმა აქვს.

იგი შეიქმნა 2015 წლის აგვისტოში არასამთავრობო ორგანიზაცია მშვიდობისა და ინტეგრაციის საერთაშორისო ცენტრის მიერ, ბავშვთა და ახალგაზრდობის განვითარების ფონდის მიერ გამოცხადებული საგრანტო კონკურსში მოპოვებული ფინანსური მხარდაჭერით.

23 თებერვალს, სოციალურმა საწარმომ მიიღო შეტყობინება თბილისის განვითარების ფონდიდან, რომ მათ ჰქონდათ 2-კვირიანი ვადა, რომ გაეთავისუფლებინათ სივრცე და დაკეტილიყვნენ ერთი წლით, ან შეეცვალათ ადგილმდებარეობა ათონელის ქუჩაზე დაგეგმილი აღდგენითი სამუშაოების გამო.

გენერატორის გუნდის თქმით, ამ ეტაპზე არანაირი ალტერნატიული სივრცე ან ფინანსური კომპენსაცია არ არის შეთავაზებული მერიის მხრიდან, ხოლო მოცემული ვადა ძალიან მცირეა ადეკვატური რეაგირებისთვის.

ორგანიზატორები მოუწოდებენ ყველას, შეიტანონ მცირედი წვლილი გენერატორის გადარჩენაში.