ძალადობრივი ჯგუფების მიერ დადგმულ ჯვარზე დასმული კითხვის პასუხად, შინაგან საქმეთა მინისტრი ვახტანგ გომელაური ამბობს, რომ მისი აზრი ამ საკითხზე ბევრისთვის საინტერესო არ იქნება. მინისტრის თქმით, ამ საკითხზე მსჯელობა მიმდინარეობს და გადაწყვეტილებას მიიღებენ.

"ჩემი აზრი ბევრისთვის ძალიან საინტერესო არ იქნება, ალბათ, მაგრამ ამაზე მსჯელობენ, რა თქმა უნდა, საპატრიარქო და ალბათ გადაწყვეტილებას მიიღებენ ამ ჯვარს იქეთ უნდა იყოს, თუ უნდა გადაიტანონ", — განაცხადა მან.

ჯვარი ძალადობრივმა ჯგუფებმა და საპატრიარქოს სასულიერო პირებმა 5 ივლისს აღმართეს.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.