ბოდბელი მთავარეპისკოპოსი იაკობი ამბობს, რომ სამომავლოდ ნინოწმინდის პანსიონი სამომავლოდ მცირე ზომის სახლის ტიპის დაწესებულებად გადაკეთდება. ამის შესახებ მან ჟურნალისტებს განუცხადა.

დღეს, 14 ივნისს ცნობილი გახდა, რომ მეუფე სპირიდონმა ნინოწმინდის პანსიონის ხელმძღვანელის პოსტი დატოვა. მის ადგილას კი პატრიარქმა ბოდბელი მთავარეპისკოპოსი დანიშნა.

"ასეთი დიდი დაწესებულებები იყო ძველად, დღეს მსოფლიო გადადის შედარებით მცირე ზომის სახლის ტიპის დაწესებულებებზე. ჩვენც ვაპირებთ, მეუფეს პირობა ხელი მოწერილი პირობაზე, ასე რომ რაღაც სიახლე მხოლოდ ჩემგან არ იქნება და 2013 წლიდან პირადად მე ასეთი ცვლილებების მომხრე ვიყავი. შემდეგ გარკვეული სიტუაციების შემდეგ ვერ განვახორციელეთ, თუმცა ნახავთ, რომ განვახორციელებთ", — აღნიშნა მეუფე იაკობმა.

ამასთან, სასულიერო პირი არ ამბობს, როდის შეძლებს სახალხო დამცველი დაწესებულებაში შესვლას. ბოლო ინფორმაციით, პანსიონიდან 30 ბავშვი უკვე გაიყვანეს და ადგილზე 23 რჩება.

13 ივნისს საპატრიარქოში გაიმართა შეხვედრა, სადაც სასულიერო პირები ევროკავშირის ელჩთან და ბავშთა უფლებებზე მომუშავე ორგანიზაციებთან ერთად ნინოწმინდის პანსიონზე მსჯელობდნენ.

შეხვედრის შემდეგ ყველა მხარემ განაცხადა, რომ მთავარია ბავშვის საუკეთესო ინტერესებზე ზრუნვა და ამაზე თანხმდებიან. ითქვა ისიც, რომ საჭიროა დიდი ზომის ინსტიტუციებიდან ბავშვების გაყვანა და ამაზეც საერთო აზრზე არიან, თუმცა გაურკვეველი დარჩა, იხურება თუ არა ნინოწმინდის პანსიონი. საპატრიარქოს პრესსპიკერის თქმით, "დახურვაზე არ არის საუბარი", ჯანდაცვის სამინისტროს წარმომადგენელმა კი დიდი ზომის ინსტიტუციების დახურვის ვალდებულებაზე ისაუბრა და ჟურნალისტების კითხვას, ნიშნავს თუ არა ეს, რომ პანსიონი იხურება, ასე უპასუხა:

"ალტერნატიული სერვისების ჩამოყალიბება... გამოდის პრინციპში, რომ პანსიონის საჭიროება აღარ იქნება. დღესაც ამ პროცესებს ჩვენ ვაგრძელებთ".

შეხვედრიდან ერთ დღეში ცნობილი გახდა, რომ მეუფე სპირიდონი პანსიონის ხელმძღვანელი აღარ იქნება და მას მეუფე იაკობი ჩაანაცვლებს.