ნინოწმინდის პანსიონის ყოფილი ბენეფიციარი ამბობს, რომ პანსიონთან დაკავშირებით პოლიციისთვის ჩვენების მიცემის შემდეგ, საპატრიარქოს უნივერსიტეტის ტერიტორიაზე აღარ უშვებენ.

"მე გამომიცხადეს, რომ ლუკა, შენ ბარგს აიღებ, ჩაალაგებ, დღეს ღამეს სხვაგან გაათევ და ხვალ წადი... უშუალოდ შემსწრე ვიყავი, რომ მასწავლებელმა ბავშვს კარადაზე არტყმევინა თავი და მერე ეს მიიჩქმალა, იმიტომ რომ ეს არც ზედამხედველს გაუგია მაშინ", — ამბობს პანსიონის ყოფილი აღსაზრდელი.

როგორც ის აღნიშნავს, აღმზრდელები ბავშვებს ფიცარსაც ურტყამდნენ.

"გვეუბნებოდნენ, რა გიკვირს, არავინ არ აღზრდილა ცემის გარეშე. აკაკი წერეთელი, ილია ჭავჭავაძეც იცემებოდა და ამიტომ გამოვიდნენ კაცები. ეს ყველაფერი უნდა დაგვემალა, რადგან ეს ყველაფერი იქნებოდა ისევ ჩვენთვის კარგი", — თქვა ბიჭმა.

დღეს, 9 ივნიის სახალხო დამცველმა, ნინო ლომჯარიამ განაცხადა, რომ ჩვენების მიცემის გამო ნინოწმინდის ყოფილ აღსაზრდელს, რომელიც ახლა საპატრიარქოს დაქვემდებარების ქვეშ არსებულ უნივერსიტეტში ირიცხება, უნივერსიტეტის ტერიტორიაზე აღარ უშვებენ. მისივე თქმით, აღნიშნული პირი უნივერსიტეტის საერთო საცხოვრებელში ცხოვრობდა და ამის გამო ამჟამად ის ღია ცის ქვეშ იმყოფება.