პარლამენტის ადამიანის უფლებათა კომიტეტის თავმჯდომარის, მიხეილ სარჯველაძის განცხადებით, ნინოწმინდის პანსიონზე პასუხისმგებლობა ეკისრება ყველას და ვინმეს მეტ ან ნაკლებ ბრალეულობაზე საუბარი მეორეხარისხოვანია. ამის შესახებ მან პარლამენტში სიტყვით გამოსვლისას განაცხადა. მისივე თქმით, ახლა ვითარება უკეთესია.

"ის, რაც ბოლო ერთი თვის განმავლობაში ვიხილეთ, არის სრულიად არანორმალური და დაუშვებელი რამ. ჩვენ ყველანი პასუხისმგებელნი ვართ იმაზე, რაც მოხდა და საუბარი ვინმეს მეტ ან ნაკლებ ბრალეულობაზე არის სრულიად მეორეხარისხოვანი. ამ წუთას ვითარება უკეთესია, ვიდრე არსებობდა თუნდაც ორი კვირის წინ, როდესაც ამავე თემაზე წინა განცხადება გაკეთდა საქართველოს პარლამენტში. უკეთესია იმდენად, რამდენადაც კითხვის ნიშნები ბავშვების უსაფრთხოებასთან, მათ ნორმალურ პირობებში ყოფნასთან დაკავშირებით ამ წუთას ნამდვილად აღარ არსებობს და სახელმწიფოს ხელთ აქვს ამ წუთას ყველა ბერკეტი საიმისოდ, რომ ბავშვების უსაფრთხოება იყოს უზრუნველყოფილი", — განაცხადა სარჯველაძემ.

მისივე თქმით, ყველას წვლილი დასაფასებელია, რის შედეგადაც პროცესები "ნორმალურ კალაპოტში" მოექცა, მაგრამ ეს მოდუნების საფუძველს არ იძლევა.

"დასაფასებელია, რომ სამოქალაქო საზოგადოებამ, სასამართლომ, სახალხო დამცველმა, ყველამ თავისი მნიშვნელოვანი წვლილი შეიტანა ამ საქმეში, რომლის შედეგადაც პროცესები მოექცა ნორმალურ კალაპოტში, მაგრამ ეს არ გვაძლევს მოდუნების უფლებას და საფუძველს — ამავე მიმართულებით კვლავ ბევრი რამ ბოლომდე იქნება მისაყვანი. ეს სწორედ ის სფეროა, სადაც ყოველგვარი კომპრომისი არის ყოველმხრივ გაუმართლებელი და უზნეო, რადგან ეს ხორციელდება ბავშვების უსაფრთხოების, ცხოვრებისა და განვითარების ნორმალური პირობების ხარჯზე", — თქვა დეპუტატმა.