მოქალაქეთა ნაწილმა შუქრუთელ მოშიმშილეებს სოლიდარობა პუშკინის სკვერში გამართულ აქციაზე გამოუცხადა. აქციაზე მოეწყო შუქრუთელების პრობლემების ამსახველი ფოტო-გამოფენა და ფილმის ჩვენება.

"სოფელ შუქრუთის მცხოვრებლები დიდი ხანია პრობლემის აღმოსაფხვრელად სახელმწიფოს აქტიურ ჩართულობას მოითხოვენ, რაც ამ დრომდე რეაგირების გარეშეა დარჩენილი", — აცხადებენ აქციის ორგანიზატორები.

ფოტო: On.ge/ხატია ღოღობერიძე

აქციაზე თავად შუქრუთელი მოშიმშილეებიც აპირებდნენ მისვლას, თუმცა როგორც ორგანიზატორებმა განაცხადეს, მათ ეს ფიზიკურად ვერ შეძლეს. შეგახსენებთ, რომ უკვე მესამე დღეა ისინი მშრალ შიმშილობაზე გადავიდნენ.

აქციაზე მხოლოდ ერთი მოშიმშილე, ჯანო ლაბაძე მივიდა, რომელმაც შეკრებილებს დანარჩენი მოშიმშილეების სახელით მადლობა გადაუხადა.

"დარწმუნებული ვარ, ჯანსაღი საზოგადოებრივი აზრი ყოველთვის შეძლებს იმას, რომ შეიცვალოს არარაციონალურად გამოყენება ჩვენი რესურსების, ეს გადაიქცეს სიკეთედ ჩვენთის და არ ვიყოთ ასეთ მდგომარეობაში", — განაცხადა ლაბაძემ.

ფოტო: On.ge/ხატია ღოღობერიძ

"მათ გააზრებული აქვთ, რომ მათი ბრძოლა არ არის მხოლოდ მათი სოფლისთვის და მათი სახლებისთვის ბრძოლა. მათ გააზრებული აქვთ, რომ ეს ბრძოლა არის მთლიანად ჭიათურის მუნიციპალიტეტისთვის", — განაცხადა აქციის ერთ-ერთმა ორგანიზატორმა.

ერთ კვირაზე მეტია შუქრუთელების პროტესტმა ჭიათურიდან თბილისში, აშშ-ს საელჩოსთან გადაინაცვლა. მათი განცხადებით, შპს ჯორჯიან მანგანეზის მიერ მადნის მოპოვებითი სამუშაოები აზიანებს მათ სახლებს, საკარმიდამო ნაკვეთებსა და მიცვალებულთა საფლავებს.

შუქრუთელებმა პროტესტი პირობების დაკმაყოფილების მოთხოვნით 2019 წლის სექტემბერში დაიწყეს. პროტესტი გაგრძელდა ნოემბერშიც. მოსახლეობას მაშინ შუქრუთში მდებარე ყველა მაღაროს შესასვლელი ერთ კვირაზე მეტხანს ჰქონდა პარალიზებული.

საპროტესტო აქციები მას შემდეგ შეწყვიტეს, რაც შპს ჯორჯიან მანგანეზის წარმომადგენლები დაზიანებული სახლების კომპენსაციის გადახედვას დაჰპირდნენ.

ამის შემდეგ შუქრუთის მოსახლეობამ პროტესტი 2020 წლის თებერვალში განაახლა. მოთხოვნები ისევ იგივე იყო. ჯორჯიან მანგანეზის მფლობელობაში არსებული მაღაროების ფუნქციონირება მათ კვლავ შეაჩერეს.

შუქრუთელთა პროტესტს მაშინ გამოეხმაურა სახალხო დამცველი და სახელმწიფოს შესაბამის უწყებებს დაზარალებულთა საცხოვრისისა და ჯანსაღ გარემოში ცხოვრების უფლების დაცვის უზრუნველყოფისკენ მოუწოდა. ჯორჯიან მანგანეზი ეკოლოგიური და სოციალური ზიანის ნაწილში თავის პასუხისმგებლობას უარყოფს.