შუქრუთელი აქტივისტები მშრალ შიმშილობაზე გადადიან. აქციების ერთ-ერთი მონაწილის განცხადებით, მათთან მოსალაპარაკებლად არავინ, მათ შორის, არც ხელისუფლების წარმომადგენელი არ მისულა.

"როგორც ჩანს, ვერ დავაჯერეთ სახელმწიფოს, რომ ჩვენ ვშიმშილობთ. დღეს გადავწყვიტეთ, რომ უწყლოდ დავიწყოთ შიმშილობა. ან დავიხოცებით, ან ვიღაც მოგვაქცევს ყურადღებას. არავინ არ გამოსულა, არც მოლაპარაკება, არც დაგვკავშირებია. არც სახელმწიფოს წარმომადგენელი და არავინ არ მოსულა საერთოდ. სახელმწიფოს ჰყავს იმდენი ადამიანი, რომ 25 ადამიანი დახოცოს შიმშილით?", — უთხრა მან TV პირველს.

შუქრუთელებმა პროტესტი პირობების დაკმაყოფილების მოთხოვნით 2019 წლის სექტემბერში დაიწყეს. პროტესტი გაგრძელდა ნოემბერშიც. მოსახლეობას მაშინ შუქრუთში მდებარე ყველა მაღაროს შესასვლელი ერთ კვირაზე მეტხანს ჰქონდა პარალიზებული.

საპროტესტო აქციები მას შემდეგ შეწყვიტეს, რაც შპს ჯორჯიან მანგანეზის წარმომადგენლები დაზიანებული სახლების კომპენსაციის გადახედვას დაჰპირდნენ.

ამის შემდეგ შუქრუთის მოსახლეობამ პროტესტი 2020 წლის თებერვალში განაახლა. მოთხოვნები ისევ იგივე იყო. ჯორჯიან მანგანეზის მფლობელობაში არსებული მაღაროების ფუნქციონირება მათ კვლავ შეაჩერეს.

შუქრუთელთა პროტესტს მაშინ გამოეხმაურა სახალხო დამცველი და სახელმწიფოს შესაბამის უწყებებს დაზარალებულთა საცხოვრისისა და ჯანსაღ გარემოში ცხოვრების უფლების დაცვის უზრუნველყოფისკენ მოუწოდა. ჯორჯიან მანგანეზი ეკოლოგიური და სოციალური ზიანის ნაწილში თავის პასუხისმგებლობას უარყოფს. შუქრუთში რამდენიმე მოქალაქემ პროტესტის უკიდურეს ფორმას მიმართა და პირი ამოიკერა.

წაიკითხეთ ასევე: