პროკურატურასთან მიმდინარე აქციაზე 9 აქტივისტი დააკავეს, მათგან 5 ხელწერილით გამოუშვეს. ამის შესახებ On.ge-ს შინაგან საქმეთა სამინისტროში განუცხადეს.

მოძრაობა სირცხვილიას ინფორმაციით, დაკავებისას პოლიციამ გიგა მაქარაშვილს ხელი მოტეხა, ნიკა ფარულავას კი ნაღრძობი აქვს. ორივე მათგანმა შსს ხელწერილით დატოვა.

მათივე ინფორმაციით, ზუკა ბერძენიშვილი, პაატა ხარატიშვილი, ტიტე გედენიძე და ბექა პაპაშვილი დროებითი მოთავსების იზოლატორში გადაიყვანეს. სასამართლო პროცესი ხვალ გაიმართება.

"დავიხსნათ ბავშვები ტყვეობიდან" — პროკურატურასთან აქცია ამ სლოგანით გაიმართა. მოქალაქეები და სამოქალაქო აქტივისტები მოითხოვდნენ, სახელმწიფომ დახუროს ნინოწმინდის პანსიონის ტიპის ბავშვთა სახლები და დაიხსნან ბავშვები ძალადობრივი გარემოდან, სასწრაფოდ გამოიძიოს პანსიონთან დაკავშირებული დანაშაულებები და შეუშვას სახალხო დამცველის წარმომადგენლები დაწესებულებაში.

უწყებასთან სიტუაცია მას შემდეგ დაიძაბა, როცა ელენე ხოშტარიამ შენობაში შესვლა და ნინოწმინდის პანსიონის საკითხზე პროკურორებთან საუბარი მოითხოვა. მას ამის საშუალება არ მისცეს. დაცვამ კარის ჩაკეტვა სცადა, რასაც დაპირისპირება მოყვა, ამ დროს ადგილზე მყოფმა პოლიციამ მაქარაშვილი დააკავა და ფოიეში შესასვლელი ჩაკეტა.

დანარჩენი აქტივისტები კი მაშინ დააკავეს, როცა ელენე ხოშტარიამ პულივიზატორით "ნინოწმინდის" დაწერა სცადა. პოლიტიკოსს ამის საშუალება არ მისცეს, აქტივისტები კი პოლიციის მანქანაში ძალით ჩასვეს.