ტელეკომპანია იმედის განცხადებით, ექსპრემიერ გიორგი გახარიასთან ინტერვიუზე არ მივიდნენ, რადგან მისი პარტიის პრეზენტაცია განსაკუთრებული მნიშვნელობის მოვლენად არ მიაჩნიათ. ამავდროულად, ისინი ამბობენ, რომ გახარიას გადადგომა ემსახურებოდა ნაციონალური მოძრაობის ინტერესებს, რაც მათთვის მიუღებელია.

"ამ შეკრებაზე ჩვენი ტელეკომპანია არ იყო წარმოდგენილი მარტივი მიზეზით: ჩვენ შემოგვთავაზეს ფორმატი, რომელშიც რამდენიმე ტელევიზიის პოლიტიკური თოქ-შოუს წამყვანებს, ერთად იბარებდნენ ინტერვიუზე გიორგი გახარიასთან. დამკვიდრებული პრაქტიკით, ამგვარი ფორმატი გულისხმობს მხოლოდ მაღალი თანამდებობის პირების მონაწილეობას ან გამოიყენება განსაკუთრებული მნიშვნელობის მოვლენების გაშუქების შემთხვევაში. ტელეკომპანია იმედმა არ მიიჩნია მოძრაობა საქართველოსთვის შეკრება განსაკუთრებული მნიშვნელობის მოვლენად და არც ბატონი გახარია აღარ გახლავთ მაღალი თანამდებობის პირი.

საზოგადოებისთვის ცნობილია, რომ ჩვენი ტელეკომპანია, სხვა მედიასაშუალებებთან შედარებით, ყველაზე მეტად დაზარალდა სააკაშვილის რეჟიმის დროს. შესაბამისად, იმედის სარედაქციო პოლიტიკის მიზანია, შევეწინააღმდეგოთ ანტიდემოკრატიული ძალების პოლიტიკურ რეანიმაციას, რასაც მხილებით და სიმართლის თქმით ვაკეთებთ — ყველაფერს თავისი სახელი უნდა დაერქვას: გიორგი გახარიას მიერ პრემიერ-მინისტრის პოსტის დატოვება იმ მომენტში, ცალსახად ემსახურებოდა ნაციონალური მოძრაობის ინტერესებს", — წერია მათ განცხადებაში.

ტელეკომპანიის განცხადებით, სამწუხაროა, რომ "ახალშობილმა" პოლიტიკურმა გაერთიანებამ, რომლის სლოგანია "არავის წინააღმდეგ", აქტივობა დაიწყო მედიის მისამართით "თითის ქნევით" და მათ "წინააღმდეგ გაილაშქრა". რაც შეეხება გახარიას სურვილს, "ყველაზე რეიტინგული ეთერით" მიმართოს საზოგადოებას, იმედში ამას არარელევანტურად მიიჩნევენ და მიზეზად "ტელეკომპანიაზე უსაფუძვლო თავდასხმას" ასახელებენ.

ექსპრემიერთან გიორგი გახარიასთან ინტერვიუს, სადაც მხოლოდ ტელევიზიების თოქ შოუების წამყვანები იყვნენ მიწვეული, ტელეკომპანია იმედისა და POS TV-ს ჟურნალისტები არ დაესწრნენ.

"სამწუხაროდ, როგორც ხედავთ, ჩემთვის გაუგებარი მიზეზების გამო იმედის და POS TV-ს ადგილები არის თავისუფალი. მიუხედავად იმისა, რომ ჩვენ ისინი მოვიწვიეთ, უფრო მეტიც, ვთხოვეთ, რომ აქ ყოფილიყვნენ წარმოდგენილი. მოგეხსენებათ, იმედი დღეს ყველაზე რეიტინგული ტელევიზიაა. უბრალოდ, ამას თავისი ახსნაც აქვს; მე ზუსტად ვიცი, რომ იმედის ბევრი ჟურნალისტი ვერ ხსნის და ვერ გაუგია, რატომ არ უნდა იყოს მათი ტელევიზია დღეს აქ წარმოდგენილი", — განაცხადა გახარიამ.

საპასუხოდ იმედმა გახარიას შესთავაზა, რომ პირველ სატელევიზიო ეთერს მათთან გამართავს, თუ ამას დათანხმდებიან. როგორც გახარიამ აღნიშნა ამის მიზეზი ის არის, რომ იმედი ყველაზე რეიტინგული ტელევიზიაა.