ექსპრეზიდენტი მიხეილ სააკაშვილი მეუფე იაკობის განცხადებას, რომ ქართველი ხალხი ენმ-ის დაბრუნებას არ დაუშვებს და იარაღსაც აიღებს ხელში, მუქარის შემცველი განცხადებითვე პასუხობს.

"ემანდ, ფრთხილად, ეგ იარაღი, რომლის აღებისკენ მოუწოდებ, მთლად იქ არ აღმოგაჩნდეს, სადაც მოგეწონებოდა "მეუფე". იმედია, ყველა პატრიოტი სასულიერო პირი გაემიჯნება ამ უპრეცედენტოდ სამარცხვინო განცხადებას!", — წერს სააკაშვილი ფეისბუქზე.

მისივე განცხადებით, ის, როგორც საქართველოს ეკლესიის რიგითი შვილი, შეურაცხყოფილია, "ყველა სხვა მორწმუნე ნაციონალთან და ზოგადად ყველა ნორმალურ ადამიანთან ერთად" და ელის "დედა-ეკლესიისგან დაუყოვნებლივ და არა ორაზროვან რეაგირებას".

ბოდბელმა ეპისკოპოსმა, მეუფე იაკობმა დღეს განცხადება გააკეთა, რომელიც, ასევე, შესაძლოა იყოს აღქმული, როგორც მუქარა. მან თქვა, რომ "ქართველი კაცი" ნაციონალური მოძრაობის დაბრუნებას არ დაუშებს და "იარაღსაც აიღებს ხელში".