კომუნიკაციების კომისიის წლიური ანგარიშის მიხედვით, 2020 წელს ტელეკომ ოპერატორებმა გასულ წელთან შედარებით 32 მილიონი ლარით ნაკლები შემოსავალი მიიღეს. კომისიის განცხადებით, 2020 წელს ტელეკომ ოპერატორების მიერ მიღებული ჯამური შემოსავალი 1 153 მილიონი ლარი იყო, 2019 წელს კი ეს რიცხვი 1 185 მილიონ ლარს შეადგენდა.

მათი ინფორმაციით, 2020 წელს საცალო მომსახურეობიდან მიღებულმა შემოსავლებმა 961 მლნ ლარი შეადგინა. საცალო შემოსავლებში კი შედის როგორც ფიქსირებული ინტერნეტი, ისე მობილური, როუმინგული, ფიქსირებული სატელეფონო და მაუწყებლობის ტრანზიტიდან მიღებული შემოსავლები.

რაც შეეხება საცალო შემოსავალს, კომისიის განცხადებით, მან 2020 წელს 490 მილიონი ლარი შეადგინა, რაც 2019 წელს მიღებულ საცალო შემოსავალზე 9 მილიონი ლარით ნაკლებია.

"რაც შეეხება ფიქსირებული ფართოზოლოვანი ინტერნეტ მომსახურებიდან მიღებულ საცალო შემოსავალს, ეს მონაცემი 2020 წელს, წინა წელთან შედარებით 5%-ით გაიზარდა და 277 მლნ ლარი შეადგინა, რაც პანდემიის პირობებში მომხმარებლების მიერ სერვისების დისტანციურ რეჟიმზე გადასვლამ განაპირობა", — ნათქვამია ოფიციალურ განცხადებაში.

კომისიის ცნობით, ტელეკომ კომპანიებმა კლება განიცადეს როუმინგიდან მიღებულ შემოსავლებშიც, რაც ასევე პანდემიით იყო გამოწვეული. 2020 წელს კომპანიებმა როუმინგიდან 8,7 მილიონი ლარი მიიღეს, რაც წინა წელთან შედარებით 35 მილიონი ლარით ნაკლებია.

ამასთან, კომისიის განცხადებით, 2020 წელს კლება დაფიქსირდა ფიქსირებულ სატელეფონო მომსახურებაშიც, კერძოდ, 2020 წელს კომპანიებმა 30,2 მლნ ლარი მიიღეს, რაც წინა წელთან შედარებით 5,3 მლნ ლარით ნაკლებია.