სოციალური სამართლიანობის ცენტრის განცხადებით, სასიცოცხლოდ მნიშვნელოვანია შეგროვდეს დეტალური ინფორმაცია საცხოვრისის უფლებაზე პაანდემიის ზეგავლენის შესახებ და მთავრობამ პანდემიის პირობებშივე დაიწყოს გამოსახლებისა და უსახლკარობის პოლიტიკის ძირფესვიანი ტრანსფორმაციისკენ მიმართული მცდელობა.

"სახელმწიფოს უმოქმედობით და შემდგომ პანდემიის მიმდინარეობით გამწვავებული მდგომარეობიდან გამოსავლის ძიებისას ისევ ადამიანის უფლებათა საერთაშორისო სტანდარტებითა და საქართველოს კონსტიტუციაში განმტკიცებული სოციალური სახელმწიფოს პრინციპით უნდა ვიხელმძღვანელოთ. სახელმწიფომ დაუყოვნებლივ უნდა მიიღოს ზომები პანდემიისას და მისი დასრულებიდან გონივრულ ვადებში საცხოვრისებიდან გამოსახლების ყველანაირი ფორმის პრევენციისა და გამოსახლების რისკის წინაშე მდგომი პირების გაძლიერების მიზნით. აუცილებელია, რომ ამგვარი მორატორიუმი მხოლოდ ფურცელზე არ არსებობდეს და მთავრობამ შეიმუშავოს მონიტორინგის ეფექტიანი სისტემა, რათა უწყებების გვერდის ავლით, კერძო სუბიექტების მიერ არ მოხდეს ადამიანების შევიწროვება და გამოსახლება",— ამბობენ ორგანიზაციაში.

მათივე თქმით, გამოსახლების მორატორიუმთან ერთად მნიშვნელოვანია სახელმწიფომ იმ ადამიანებს, რომლებიც ფინანსური ვალდებულებების შეუსრულებლობის და საცხოვრისის დაკარგვის საფრთხის წინაშე არიან, მხარი დაუჭიროს

"სათანადო საცხოვრებელზე გაეროს სპეციალური მომხსენებელი მიუთითებს სახელმწიფოთა ვალდებულებაზე, უზრუნველყონ ბანკებისა და სესხის გამცემი სხვა სუბიექტების მოლაპარაკება პანდემიით დაზარალებულ პირებთან და იმის გარანტირება, რომ პანდემიის დროს და მისი დასრულებიდან გონივრული ვადის განმავლობაში არ მოხდეს ამ პერიოდში შინამეურნეობების შემცირებული თვიური შემოსავლების 30 პროცენტზე მეტის სასესხო ვალდებულების შესრულებისთვის დათმობა", — აცხადებს სოციალური სამართლიანობის ცენტრი.