შინაგან საქმეთა მინისტრმა, ვახტანგ გომელაურმა კორონავირუსის წინააღმდეგ ჩინური სინოფარმი გაიკეთა. მასთან ერთად ვაქცინა უწყების სხვა თანამშრომლებმაც გაიკეთეს, მათ შორის პოლიციელებმა და მეხანძრე-მაშველებმა. ვაქცინის პირველი დოზით აიცრა საპატრულო პოლიციის დეპარტამენტის უფროსი, ვაჟა სირაძეც.

"ეს ნაბიჯი გადავდგი იმისთვის, რომ მინდა ყველას მოვუწოდო, პირველ რიგში შინაგან საქმეთა სამინისტროს თანამშრომლებს, წავახალისო, რომ გაიკეთონ ვაქცინა. ეს შეიძლება იყოს სინოფარმი, ან ასტრაზენეკა ან სხვა ვაქცინა. რასაც ვხედავთ ჩვენ მსოფლიოში, წელიწადზე მეტია ველოდებით, მაგრამ არაფერი შეცვლილა. თითქმის უარესდება მდგომარეობა მსოფლიოში და ჩვენთანაც. დღითიდღე ბევრი ადამიანი იღუპება. რასაც გვეუბნება მსოფლიო ჯანდაცვის ორგანიზაცია და ჩვენი ჯანდაცვის სამინისტრო, სხვა გამოსავალი არაა, ყველა უნდა აიცრას", — აღნიშნა გომელაურმა აცრის შემდეგ.

ფოტო: ანა მსხალაძე / On.ge

ფოტო: ანა მსხალაძე / On.ge

სინოფარმით 4 მაისს სინოფარმით ვაქცინაცია დაიწყო იმუნიზაციის პროცესში ჩართულ 30 დაწესებულებაში 33 ამცრელი ბრიგადით. 5 მაისიდან ემატება კიდევ 44 სამედიცინო დაწესებულება.

სინოფარმს WHO-ს ავტორიზაცია ჯერ არ მიუღია. ჯანდაცვის სამინისტროში აცხადებენ, რომ სინოფარმით აცრა "ავტორიზაცია მალე დაეწევა".

"200 მილიონ დოზაზე მეტი აქვს გაცემული სინოფარმის მწარმოებელს სხვადასხვა ქვეყნებისთვის და ძალიან ფართო მოცვა არსებობს უკვე ამ ვაქცინის. მისი უსაფრთხოების შესახებ არ არის კითხვის ნიშნები. ამდენად ჩვენ დავიწყეთ ვაქცინაციას და ვფიქრობთ, რომ ჯანმოს ავტორიზაციაც მალევე დაეწევა, თუ არ დაასწრებს", — განაცხადა ჯანდაცვის მინისტრის მოადგილემ, თამარ გაბუნიამ.

27 აპრილს ცნობილი გახდა, რომ ჩინურ ვაქცინა სინოფარმზე რეგისტრაცია 18 წლის ზემოთ მოქალაქეებსაც შეეძლებათ. ჯანდაცვის მინისტრ ეკატერინე ტიკარაძის თქმით, ამის საფუძველი არაერთი კვლევაა, სადაც 18-დან 60 წლამდე მოქალაქეებისთვის სინოფარმი არის უსაფრთხო ვაქცინა.

WHO-ს ნებართვის მიღების შემთხვევაში, ჩინური Sinopharm იქნება პირველი ვაქცინა არადასავლური ქვეყნიდან, რომელმაც ჯანდაცვის მსოფლიო ორგანიზაციისგან მიიღო ნებართვა. ამ ეტაპზე კი, WHO-ს საგანგებო გამოყენების ნებართვა გაცემული აქვს ისეთი ვაქცინებისთვის, როგორიცაა Pfizer-BioNTech, AstraZeneca and Johnson & Johnson.