შვეიცარიული ბანკი Credit Suisse Group AG ბიძინა ივანიშვილს უჩივის. ბანკის საჩივრის მიზეზი გახდა ის, რომ ივანიშვილმა და მისმა მრჩევლმა შვეიცარიის საბანკო რეგულატორის 2017 წლის ანგარიში გაასაჯაროვეს. ანგარიში თაღლითობისთვის ნასამართლევი ყოფილი ბანკირის, პატრის ლესკადრონის შესახებ ინფორმაციას შეიცავდა. ამაზე გამოცემა Bloomberg წერს.

მედიის ცნობით, მხარეების მოსმენა ლონდონში ხუთშაბათს გაიმართა, სადაც გადაწყდა, რომ დოკუმენტი ვებსაიტიდან csvictims.com-იდან მანამდე აიღონ, სანამ სასამართლო სხდომები მიმდინარეობს. გამოცემის ინფორმაციითვე, ამ ვებსაიტის უკან საზოგადოებასთან ურთიერთობის ფირმა Metigen დგას, რომელმაც ეს დოკუმენტი თებერვალში გამოაქვეყნა. Bloomberg-ის განცხადებით, მანამდე Credit Suisse-ს სასამართლოს გადაწყვეტილების საფუძველზე, დოკუმენტის კონფიდენციალურად შენახვის უფლება მიენიჭა.

Bloomberg წერს, რომ ბანკირის თაღლითური სქემის მსხვერპლი არაერთი ინვესტორი გახდა, მათ შორის, ბიძინა ივანიშვილი. ამ ინვესტორებს მიაჩნიათ, რომ Credt Suisse-მა ბანკირის დანაშაულებზე გარკვეული პასუხსიმგებლობა უნდა აიღოს.

Metigen-ის დირექტორის, ჩარლი ვიგანის განცხადებით, გამომდინარე იქიდან, რომ დოკუმენტის გარკვეული ფრაზები მედიაში უკვე ხელმისაწვდომია, "აღმაშფოთებელია, რომ ერთადერთები, რომლებსაც Credit Suisse დოკუმენტის გამოყენებაში ხელს უშლის, თავად დანაშაულის მსხვერპლები არიან".

მედიისის განცხადებით, პატრის ლესკადრონის საქმე 2015 წელს გახმაურდა, როცა ბანკირმა აღიარა, რომ აყალბებდა ხელმოწერებს, სავაჭრო ტრანზაქციებსა და ცდილობდა, 2008 წელს მიყენებული ფინანსური ზარალის ასანაზღაურებლად დრო მოეგო. როგორც Credit Suisse ამტკიცებდა, ბანკირი, რომელმაც 2020 წელს სიცოცხლე თვითმკვლელობით დაასრულა, მარტო მოქმედებდა.