ჯანდაცვის მინისტრის მოადგილის, თამარ გაბუნიას განცხადებით, ვაქცინაციაზე უარის თქმამ დისკრიმინაცია არ უნდა გამოიწვიოს და ნებისმიერი მოტივაციის მექანიზმი ეთიკურად გამართლებული უნდა იყოს.

"ბევრი ქვეყანა დღეს განიხილავს მოტივაციის სხვადასხვა მექანიზმს, თუმცა ნებისმიერი მოტივაციის მექანიზმი ეთიკურად გამართლებული უნდა იყოს და არ უნდა გამოიწვიოს არანაირი დისკრიმინაცია თუნდაც იმ შემთხვევაში, რომ ადამიანი უარს ამბობს ვაქცინაზე. განსაკუთრებით დღეს, როდესაც ჩვენ ვიწრო ფარგლებში გვაქვს ვაქცინაციის პროგრამა, საყოველთაო ვაქცინაცია ჯერ არ დაწყებულა. როდესაც მეტად ფართო იქნება ხელმისაწვდომობა ვაქცინებზე, მოტივაციის მექანიზმებზე უფრო აქტიურად დავიწყებთ მსჯელობას. ამასობაში საერთაშორისო გამოცდილებაც დაგროვდება და უფრო თამამი გადაწყვეტილებების მიღების შესაძლებლობა გვექნება", — თქვა გაბუნიამ.

დაავადებათა კონტროლის ეროვნული ცენტრის დირექტორმა, ამირან გამყრელიძემ 26 აპრილს განაცხადა, რომ ისინი მომხრე არიან, კორონავირუსის საწინააღმდეგო ვაქცინით აცრილ ადამიანებს ან დაწესებულებებს შესაბამისი "პრივილეგიები", ანუ უპირატესობები ჰქონდეთ. გუშინ, 28 აპრილს მან, ასევე, თქვა, რომ Covid-19-ზე ორჯერადად აცრილ ადამიანებს შესაძლოა, შეზღუდვებზე შეღავათები შეეხოთ. გამყრელიძის თქმით, რიგ ქვეყნებში ვაქცინირებულ ადამიანებს გარე სივრცეში პირბადის ტარების ვალდებულება არ აქვთ და კომენდანტის საათის დროსაც თავისუფლად გადაადგილდებიან.