მედიის განვითარების ფონდი დოიჩე ველე აკადმიასთან თანამშრომლობით უკვე მეოთხე წელია, ახალგაზრდებს მედიაწიგნიერების კურსის გავლისა და ფაქტების გადამოწმების პლაფტორმა მითების დეტექტორზე სტაჟირების გავლის შესაძლებლობას აძლევს.

კურსი არაჟურნალისტებს შესაძლებლობას აძლევს, შეისწავლონ როგორ ფუნქციონირებს დემოკრატიულ საზოგადოებაში მედია, განივითარონ პრაქტიკული უნარები, რომლებიც სხვადასხვა ტიპის ინფორმაციის გადამოწმების შესაძლებლობას იძლევა.

პროგრამას უკვე 154 კურსდამთავრებული და ამჟამად 21 მსმენელი ჰყავს. ბევრი მათგანი როგორც მედიის განვითარების ფონდის, ასევე სხვა ორგანიზაციების კვლევით, მედია და მედიაწიგნიერების პროექტებში არიან დასაქმებული.

"პროგრამის სლოგანია 'დაადგინე სიმართლე შენით!' რაც იმას ნიშნავს, რომ ჩვენ ახალგაზრდებს მზა გადაწყვეტილებებს კი არ ვაწოდებთ, არამედ მათ იმ უნარებს ვუვითარებთ, რომლებიც მათ საზიანო ინფორმაციის გაფილტვრაში ეხმარება და რაც მთავარია, კრიტიკულ აზროვნებას უწყობს ხელს, რაც საზოგადოების თვითმმართველობისთვის უაღრესად მნიშვნელოვანია", — ამბობს მედიის განვითარების ფონდის აღმასრულებელი დირექტორი თამარ კინწურაშვილი.

ამჟამად მიმდინარეობს მეათე ჯგუფისთვის მსმენელების შერჩევა.

თუ ხარ 18-დან 28-წლამდე და გინდა გახდე დოიჩე ველე აკადემიისა და მითების დეტექტორის სერტიფიცირებული ფაქტჩეკერი ან მედია მკვლევარი, მაშინ იჩქარე, მითლაბის მე-10 ჯგუფში აპლიკაციების მიღება 30 აპრილამდე გრძელდება.

პროექტის ფარგლებში სტუდენტები 3,5 თვის განმავლობაში ტრენინგებს გაივლიან ისეთ საკითხებში, როგორიცაა:

  • მედიის გამჭვირვალობა;
  • ფაქტების გადამოწმება ღია წყაროებითა და ინსტრუმენტებით: ყალბი ინფორმაცია, ვიზუალი, პროფილები;
  • კიბერუსაფრთხოება;
  • მულტიმედია პროდუქტის წარმოება;
  • მონაცემთა ვიზუალიზაცია.

სტუდენტები კურსის განმავლობაში კრიტიკულ აზროვნებას ივითარებენ, რათა თავად შეძლონ ინფორმაციული ნაკადის გაფილტვრა და არ გახდნენ დეზინფორმაციის მსხვერპლი და არც გამავრცელებელი.

სტუდენტებისთვის გათვალისწინებულია სტაჟირება მითების დეტექტორის ვებგვერდზე, რაც კვირის განმავლობაში მათთან ინდივიდუალურ მუშაობას გულისხმობს. კურსის განმავლობაში მომზადებული საუკეთესო მასალები ვებ-გვერდზე გამოქვეყნდება, ხოლო მულტიმედია მასალების ავტორები ჰონორარს მიიღებენ.

კურსის ბოლოს გათვალისწინებულია ფინალური კონკურსი, რომელიც საუკეთესო მულტიმედია ნაშრომს გამოავლენს. გამარჯვებულებს გადაეცემათ პრიზები, საუკეთესო შედეგის მქონე კონკურსანტი კი პროგრამის მთავარ პრიზს — ლეპტოპს მიიღებს.

პროექტი 2017 წლიდან, დოიჩე ველე აკადემიის მხარდაჭერით წარმატებით ხორციელდება.

დაინტერესებულ პირებს აპლიკაციის გაგზავნა 30 აპრილამდე ონლაინ შეუძლიათ. მედიის განვითარების ფონდი შემოსული აპლიკაციებიდან 20 მონაწილეს შეარჩევს, ორი კანდიდატი შეირჩევა იმ ახალგაზრდებიდან, რომელთა მშობლიური ენა აზერბაიჯანული ან სომხურია.

კურსის შესახებ დამატებით ინფორმაციას გაეცანით მედიის განვითარების ფონდის ვებგვერდზე. მითლაბელების ნაშრომების გაცნობა კი მითების დეტექტორის ვებგვერდზე შეგიძლიათ.