იმუნოლოგ-ალერგოლოგის, ბიძინა კულუმბეგოვის თქმით, ფილერებთან დაკავშირებით იმონოლოგიური რეაქცია გრიპის ვაქცინაციის დროს წლების წინ არის აღმოჩენილი, თუმცა არსებობს რეკომედაცია, რომ ეს არ არის ვაქცინის წინააღმდეგ ჩვენება და ამის გამო მოქალაქეებმა ვაქცინაციისგან თავი არ უნდა შეიკავონ.

"დღეს გავრცელდა ინფორმაცია და ბევრი ადამიანი მწერს, მირეკავს ამის შესახებ, ფილერებთან დაკავშირებით. ჯერ კიდევ ფილერებთან დაკავშირებული იმონოლოგიური რეაქცია, პასუხი იმუნიტეტის ჯვარედინი გრიპის ვაქცინაციის დროს წლების წინ არის აღმოჩენილი, ეს არ არის ახალი მოვლენა, თუმცა ასევე, Pfizer-თან მიმართებით ამერიკის შეერთებულ შტატებში და ევროპის რამდენიმე ქვეყანაში ეს შემჩნეული იქნა, თუმცა დღეს არსებობს ასეთი რეკომენდაცია, რომ ეს არ არის არავითარი ვაქცინის წინააღმდეგ ჩვენება.

თუ შეშუპება ფიქსირდება, სპეციფიკური სქემაც კი არის მოწოდებული პრენდიზოლონის ტიპის პრეპარატებით, სულ რამდენიმედღიანი ჰორმონის ჩართვაა საჭირო და ეს უკვალოდ ქრება. ამიტომ ვისაც ფილერი აქვთ, არ შეეშინდეთ, ამის გამო თავი არ შეიკავონ ვაქცინაციისგან", — განაცხადა კულუმბეგოვმა ფორმულას ეთერში.

დაავადებათ კონტროლის ცენტრის დირექტორმა, ამირან გამყრელიძემ განაცხადა, რომ Pfizer-ის ვაქცინის წინ ჩასატარებელ ჩეკლისტში არის კითხვა იმის შესახებ, იყენებს თუ არა ასაცრელი კოსმეტიკურ ფილერს. მისი თქმით, აღნიშნულ ვაქცინას აქვს გვერდითი მოვლენები, რაც არ ნიშნავს ანაფილაქსიური შოკის საფრთხეს, მაგრამ, შესაძლოა, გამოიწვიოს ადგილობრივი გართულება მათში, ვინც ხშირად იყენებს ფილერს.

აშშ-ს დაავადებათა კონტროლისა და პრევენციის ცენტრის (CDC) ინფორმაციით, იშვიათ შემთხვევებში mRNA ვაქცინის გაკეთებისას შეიძლება შეშუპება განვითარდეს იმ ადგილზე, სადაც ფილერი არის გაკეთებული. როგორც აღნიშნულია, შეშუპება დროებითია და შესაბამისი მკურნალობის შემდეგ გადის. ამასთან, CDC მიუთითებს, რომ აცრის გაკეთება შეუძლიათ ფილერის მქონე პირებს, რომელთან ვაქცინაციის მიმართ უკუჩვენება არ აქვთ. თუმცაღა ურჩევენ, შე0შპების გაჩენის შემთხვევაში კონსულტაცია ექიმთან გაიარონ.