ჯანდაცვის მინისტრის მოადგილის, თამარ გაბუნიას განცხადებით ვაქცინის ირგვლივ საინფორმაციო კამპანია ამ კვირაში დაიწყება. ამის შესახებ მან საკოორდინაციო საბჭოს წევრების ბრიფინგზე ისაუბრა.

"საინფორმაციო კამპანია აქტიურად გაიხსნება ამ კვირაში, რადგან უკვე ახლოს არის ის მომენტი, როდესაც ვაქცინა რეალურად ქვეყანაში შემოვა. ეტაპობრივად არის დაგეგმილი საინფორმაციო კამპანია და მესიჯებიც რა თქმა უნდა, იქნება იმის მიხედვით თუ რომელ ვაქცინას ველოდებით და რომელზე უფრო მეტი ინფორმაცია სჭირდება მოსახლეობას", — თქვა მან.

2 მარტს დაავადებათა კონტროლის ეროვნული ცენტრის დირექტორმა, ამირან გამყრელიძემ განაცხადა, რომ საქართველო Novavax-თანაც აწარმოებდა მოლაპარაკებებს. საქართველოში Covid-19-ზე ვაქცინა, ჯერჯერობით, არ შემოსულა. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზა შემოვიდოდა. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებდა.

გაიგეთ მეტი: