მთავარი არხის ინფორმაციით, ტელევიზიის ჟურნალისტს, ემა გოგოხიას მესტიის მერი დაემუქრა, სიტყვიერი შეურაცხყოფა მიაყენა და ქვეყნის დასატოვებლად ფული შესთავაზა.

ტელეკომპანიაში ამბობენ, რომ ემა გოგოხია მესტიაში საერთაშორისო გამჭვირვალობა — საქართველოს ანგარიშის მიხედვით სიუჟეტის მოსამზადებლად ჩავიდა, რომელიც მესტიის მერის სავარაუდო კორუფციულ სქემას ეხება.

მთავარი არხის მიერ გავრცელებულ ჩანაწერში ისმის, რომ კაპიტონ ჟორჟოლიანი ჟურნალისტს აგინებს.

"თუ შეიძლება, ცოტა თავი შეიკავე ცუდი ქმედებისაგან. [...] რომ არ მოგკლა არავინ. არ დაგინახო მესტიაში, წადი, ფულს მოგცემ, საქართველოში არ დაგინახო", — ისმის ჩანაწერში, სადაც გარკვეული სიტყვები ბუნდოვანია.

ტელეკომპანიაში ამბობენ, რომ ამ სატელეფონო საუბრის შემდეგ ჟურნალისტს დაუდგენელმა პირებმა ავტომობილი დაუზიანეს და მანქანას საბურავები აქვს დაჭრილი, სავარაუდოდ, დანით.

მთავარი არხის ინფორმაციით, ჟურნალისტმა უკვე მიმართა შინაგან საქმეთა სამინისტროს და ჩანაწერის სრული ვერსია გადასცა. უწყებაში On.ge-ს უთხრეს, რომ გამოძიება საქართველოს სისხლის სამართლის კოდექსის 151-ე და 187-ე მუხლებით დაიწყეს, რაც მუქარასა და სხვისი ნივთის დაზიანებას გულისხმობს.

მთავარი არხის გენერლური დირექტორი, ნიკა გვარამია მესტიის მერის უმკაცრესად დასჯას ითხოვს.