ჯანდაცვის მინისტრი, ეკატერინე ტიკარაძე სამინისტროს მენეჯმენტს 10-ქულიანი სისტემიდან 8-9 ქულით აფასებს. მინისტრი კორონავირუსთან და ვაქცინასთან დაკავშირებით რადიო თავისუფლების კითხვებს უპასუხა.

ეკატერინე ტიკარაძეს ჰკითხეს, რამდენი ქულით აფასებს კოვიდთან ბრძოლას, რაზეც მან უპასუხა:

"ყოველთვის მეუხერხულება, როდესაც მეკითხებიან რამდენად შევაფასებდი სამინისტროში ჩვენს მენეჯმენტს, მაგრამ არაერთხელ მომისმენია, რამდენად დადებითად აფასებენ ჩვენი პარტნიორი ქვეყნები საქართველოში მიმდინარე პროცესებს, როგორ ვმართავთ პანდემიას. და შეიძლება უკვე დროული იყოს, გადავიდეთ სამინისტროში იმ რეჟიმზე, რომ ჩვენც შევძლოთ და შევაფასოთ ჩვენი თავი და ვთვლი, რომ 10-ბალიანი სისტემაში 8-დან 9 ბალამდე ნამდვილად არის მენეჯმენტის ხარისხი და ის შედეგები, რომელიც გვაქვს განხორციელებული", — აღნიშნა მინისტრმა.

მისივე თქმით, გასათვალისწინებელია, რომ საქართველოში ყველა მიმართულებით "მყიფე" ვითარებაა და ოპონენტების მხრიდან მხოლოდ ბრალდებები ისმის. როგორც ტიკარაძე ამბობს, არსებული ჯანდაცვის სისტემის პირობებში მათ მაქსიმუმი შეძლეს.