ეკონომიკისა და მდგრადი განვითარების სამინისტრო ნამახვანჰესის ხელშეკრულებაზე არასამთავრობო ორგანიზაცია EMC-ის შეფასებას სპეკულატიურსა და დილეტანტურს უწოდებს. სამინისტრომ 17-გვერდიანი პასუხი გამოაქვეყნდა.

სამინისტრო მიიჩნევს, რომ EMC-ს შეფასება ვერ აკმაყოფილებს მინიმალურ პროფესიულ და ეთიკურ სტანდარტებს, რადგან ის არაა სამართლიანი და მიუკერძოებელი შეფასება.

"წარმოდგენილი დოკუმენტი აბსოლუტურად სპეკულატიურია, სრულიად დილეტანტური და გათვლილია მთლიანად ქართული ჰიდროენერგეტიკის საწინააღმდეგოდ აგორებული სადისკრედიტაციო კამპანიის ფარგლებში ვითომ კომპეტენტური დოკუმენტის შესაქმნელად, რომელსაც პრეტენზია სამართლებრივ შეფასებასა და კრიტიკაზე აქვს", — ნათქვამია სამინისტროს განცხადებაში.

გარდა ამისა, ეკონომიკის სამინისტროში აცხადებენ, რომ ნამახვანჰესის მოპოვებული ხელშეკრულება არის ოფიციალურად გამოთხოვნილი, როგორც საჯარო ინფორმაცია და ამის გაკეთება ნებისმიერ ფიზიკურ თუ იურიდიულ პირს შეუძლია.

ადამიანის უფლებების სწავლებისა და მონიტორინგის ცენტრის (EMC) განცხადებით, ნამახვანჰესის ხელშეკრულებით მნიშვნელოვანი სახელმწიფო ინტერესები დათმობილია კერძო კომპანიის სასარგებლოდ. როგორც ორგანიზაციაში ამბობენ, პროექტს არათუ ვერ ექნება ის წვლილი ქვეყნის ენერგოუსაფრთხოებაში, რაზეც მთავრობა მიუთითებს, არამედ შეთანხმება ქვეყნის ბიუჯეტისთვის მძიმე და განუსაზღვრელ ფისკალურ ტვირთებს ითვალისწინებს.

ნამახვანიჰესის კასკადი მდინარე რიონზე უნდა აშენდეს და ორ ჰესს მოიცავს, ქვემო და ზემო ნამახვანჰესს. ორივე ჰესი ერთად 433 მგვტ სიმძლავრის იქნება. პროექტი 750 მილიონი აშშ დოლარის ღირებულებისაა და იგეგმება, რომ კასკადი ექსპლუატაციაში 2025-2026 წელს შევიდეს. პროექტს კომპანია ენკა რინიუებლზ ახორციელებს.

ადგილობრივი მოსახლეობა სოფელ ჟონეთში ოთხი თვეა ჰესის მშენებლობას აპროტესტებს. ისინი ხეობიდან კომპანიის გასვლასა და მშენებლობის შეჩერებას მოითხოვენ.

28 თებერვალს ქუთაისში მრავალათასიანი აქცია გაიმართა, სადაც მოსახლეობამ და ჰესის მოწინააღმდეგეებმა კვლავ გააპროტესტეს მისი მშენებლობა. ამავე დროს, ქართულ ოცნებაში მიაჩნიათ, რომ ადგილობრივი მოსახლეობისთვის არაა ნაჩვენები ნამახვანჰესის სიკეთეები და მეტი კომუნიკაციაა საჭირო.

ორგანიზაციაში აღნიშნავენ, რომ ინვესტორი კომპანია ENKA-სთვის არაერთი გარანტია კანონის გვერდის ავლით არის მიცემული, ამასთან, ყველა შესაძლო ბიზნესრისკი, კომპანიის სასარგებლოდ სახელმწიფო ბიუჯეტით არის დაზღვეული. გარდა ამისა, EMC მიუთითებს, რომ კომპანია ბუნებრივ რესურსს უსასყიდლოდ ითვისებს.