ევროპული საქართველოს ლიდერის, გიგა ბოკერიას განცხადებით, ოპოზიციაში კომპრომისის სახით განიხილავენ პლებისციტს და მხოლოდ გაუხარდება თუ ბიძინა ივანიშვილი მიხეილ სააკაშვილის "ჯინაზე" დათანხმდება პლებისციტს.

"ევროპული საქართველოს, ჩვენი პოზიცია და ყველა პარტიის, მათ შორის ნაციონალური მოძრაობის, ამ მომენტამდე იყო და რჩება ასეთ პოზიციად, რომ ჩვენ გვინდა ვადამდელი არჩევნები, პოლიტპატიმრების გათავისუფლება და ეს პაკეტი საარჩევნო ადმინისტრაციაზე, მაგრამ კომპრომისის სახით, რა თქმა უნდა, განვიხილავთ პლებისციტს, რაც ქართველ ხალხს ეკითხება სურთ თუ არა ახალი არჩევნები. ბუნებრივია, ეს ყველაფერი ხდება პოლიტმატიმრების, მელიასა და 8 მარტის შეთანხმებიდან ჩატოვებული გამოშვების და იმ პაკეტის მიღების ფონზე, რაც ოპოზიციას უკვე შეთავაზებული აქვს მოლაპარაკებებში. რაც შეეხება ბატონი სააკაშვილის განცხადებას, ახლა მთავარია ივანიშვილმა სააკაშვილის ჯინაზე გადაწყვიტოს, რომ თანხმდება პლებისციტს, გამოუშვას პოლიტპატიმრები, გააკეთოს ეს ყველაფერი, შემდეგ შეეგუოს მარცხს ჯერ პლებისციტში და მერე შეეგუოს მარცხს არჩევნებში. სააკაშვილის ჯინაზე ქნას ეგ ყველაფერი, მე მხოლოდ გამიხარდება", — განაცხადა ბოკერიამ.

საქართველოს ყოფილი პრეზიდენტის, მიხეილ სააკაშვილის განცხადებით, რიგგარეშე არჩევნებთან დაკავშირებით პლებისციტის მოდელს ოპოზიცია არ უნდა დათანმხდეს.