ჯანდაცვის მინისტრის მოადგილის, თამარ გაბუნიას განცხადებით, "არა მგონია" Covax პლატფორმასთან საქმე სასამართლომდე მივიდეს. ამის შესახებ მან პირველი არხის ეთერში ისაუბრა.

"ყველაზე კარგი განმარტება იქნება, რომ ვაქცინა რეალურად შემოვა. აქ საუბარია 2-3 კვირის გადავადებაზე. Pfizer-ს ჩვენთვის არც უთქვამს, რომ ის შეპირებული დოზები, რომელიც თებერვალში უნდა ჩამოსულიყო, ძალიან დაიგვიანებს. აქ იყო საუბარი 2-3-კვირიან გადავადებაზე და საუბარი იმაზე, რომ AstraZeneca დაასწრებს Pfizer-ს ჩამოსვლას. უნდა დაველოდოთ და გავაგრძელოთ ჩვენი საქმე ეტაპობრივად და თანმიმდევრულად, როგორც აქამდე", — თქვა მან.

1-ელ მარტს ჯანდაცვის მინისტრმა, ეკატერინე ტიკარაძემ განაცხადა, რომ არ არის გამორიცხული, საქართველომ Covax პლატფორმას უჩივლოს, ვინაიდან რეპუტაციულ რისკებზეცაა საუბარი. ასე უპასუხა მან Covax-ს განმარტებას იმაზე, თუ რატომ ვერ მიიღო საქართველომ ვაქცინა. Covax-ის ცნობით, თებერვლის ბოლოს ნაადრევი გზავნილები იმ ქვეყნებში განხორციელდა, რომლებმაც კრიტერიუმები უკვე დააკმაყოფილეს.