საოკუპაციო ხაზის მიღმა მდებარე რეგიონებიდან სანდო ინფორმაცია ძალიან მწირია და, ფაქტობრივად, არ არსებობს. საერთო პროექტის ფარგლებში OC Media და On.ge სწორედ ამ სიცარიელის ამოვსებას ეცდებიან და მკითხველებს გააცნობენ სტატიებს საქართველოს ოკუპირებული ტერიტორიებიდან. მასალებში განხილული იქნება ოკუპირებულ აფხაზეთსა და სამხრეთ ოსეთში მიმდინარე ყოველდღიური ამბები, იქ მცხოვრები ადამიანების პრობლემები, მათი მოსაზრებები კონკრეტულ საკითხებზე, პოლიტიკური ცვლილებები და ა.შ. ეს მკითხველს დაეხმარება უკეთ გაიგოს, რა ხდება იქ, სადაც საქართველოს ხელისუფლების კონტროლი ვერ ვრცელდება.

OC Media-ს გუნდს შეუერთდა ორი ადგილობრივი ჟურნალისტი — ოკუპირებული აფხაზეთიდან და ოკუპირებული ცხინვალის რეგიონიდან. ეს შესაძლებელი გახდა ევროკავშირისა და UNDP-ის COBERM-ის პროგრამის ფინანსური მხარდაჭერით.

"ისინი მუშაობას უკვე შეუდგნენ და ამ ორი რეგიონიდან სიღრმისეული, გადამოწმებული და ხარისხიანი მასალებით გვეხმარებიან. მათ უკვე გამოაქვეყნეს სტატიები, რომლებიც აქამდე ინგლისურ ენაზე არ გაშუქებულა და უფრო მეტი საინტერესო სტატიებიც მალე იქნება", — ამბობენ OC Media-ში.

On.ge-სთან თანამშრომლობა სწორედ ამ სტატიების ქართულ ენაზე გამოქვეყნებას ითვალისწინებს. მკითხველისთვის გვინდა განვმარტოთ, რომ რაკი ავტორები ოკუპირებულ რეგიონებში მცხოვრები ადამიანები არიან, სტატიებში დატოვებული იქნება მათ მიერ გამოყენებული ტერმინოლოგია, თუმცა მასალაში ნახსენებ ტერიტორიებს, რომლებიც მდებარეობს ოკუპირებულ აფხაზეთსა და ცხინვალის რეგიონში, On.ge-ის რედაქცია, ისევე, როგორც სახელმწიფო, დამოუკიდებელ ერთეულებად არ აღიარებს. შესაბამისად, ადგილმდებარეობებსა და წოდებებთან მოიაზრება სიტყვები: "ოკუპირებული" და "დე-ფაქტო". მსგავსი აღნიშვნა ყველა სტატიას ექნება დართული.

პირველ სტატიას On.ge 6 მარტს გამოაქვეყნებს და ის ოკუპირებულ ცხინვალის რეგიონში არსებულ პოლიტიკურ კრიზისს ეხება.