დაავადებათ კონტროლის ეროვნული ცენტრის ხელმძღვანელი, ამირან გამყრელიძე იმედოვნებს, რომ მაისის ბოლომდე ქვეყანაში 200 000-მდე ადამიანს კორონავირუსზე ორჯერადად აცრიან. მისივე თქმით, ივნისიდან საქართველო მასობრივ იმუნიზაციაზე უნდა გადავიდეს.

"ჩვენ გვჭირდება წელს, თავისი დანაკარგით, დაახლოებით, 3,9 მილიონი დოზა. აქედან 1 400 000-ზე ხელშეკრულება უკვე გაფორმებულია. ეს გარკვეულად გარანტირებულია. დამატებით ჩვენ პირდაპირი მოლაპარაკებებით ვცდილობთ, რომ 2,5 მილიონი დოზა მოვიპოვოთ. ამის პირველი ნაბიჯი მომავალ 2 კვირაში გაირკვევა ამ ე.წ. არაკოვაქსის მექანიზმის გზით ვაქცინების მოპოვებისა. არ ვსაუბრობ წინასწარ, მაგრამ ამას მოჰყვება 2-3 სერიოზული ხაზი ე.წ. პირდაპირი მოლაპარაკებების გზით ქვეყანაში ვაქცინების შემოტანის.

ძალიან დიდი იმედი მაქვს, რომ ჩვენ სადღაც მაისის ბოლომდე გეგმა გვაქვს, ქვეყანაში, დაახლოებით, 200 000-მდე ადამიანი ორჯერადად ავცრათ. ანუ, სადღაც 400 000 აცრა მაისის ბოლომდე. ხოლო ივნისიდან უკვე მასობრივ იმუნიზაციაზე გადავალთ", — განაცხადა გამყრელიძემ საზოგადოებრივ მაუწყებელთან.

საქართველოში Covid-19-ზე ვაქცინა, ჯერჯერობით, არ შემოსულა. პირველი ვაქცინა, რომელიც საქართველოში უნდა შემოვიდეს Pfizer-ია. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზაც შემოვიდოდა. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებს.

გაიგეთ მეტი: