გირჩი — მეტი თავისუფლებას ლიდერის, ზურაბ ჯაფარიძის ბარი პოლიციელებმა დალუქეს. მათ, ასევე, როგორც თვითონ აღნიშნეს ტერიტორიიდან 2 ადამიანი დასაკითხად წაიყვანეს.

ჯაფარიძე აღნიშნულ ქმედებას მათი მხრიდან დღეს ვარაუდობდა.

"შეიძლება ქნან ეგეთი რამე, დალუქვით ვერ გამაჩერებენ, ავხსნი ლუქს და მაინც გავხსნი ბარს, მოუწევთ ნებისმიერ შემთხვევაში დაპატიმრება", — თქვა მან ბარის გახსნამდე ცოტა ხნით ადრე.

დღეს ადგილზე იმყოფებოდა შრომის ინსპექცია. მათ განაცხადეს, რომ დააფიქსირეს "არანებადართული ეკონომიკური საქმიანობის" განმეორება, რისი ამსახველი მასალებიც შსს-ს გაეგზავნება.

გუშინ ზურაბ ჯაფარიძე ბარის გახსნისთვის 2 000 ლარით დააჯარიმეს. განმეორების შემთხვევაში, მას სისხლისსამართლებრივი პასუხისმგებლობა დაეკისრება. ადგილზე შრომის ინსპექცია, მუნიციპალური ინსპექცია და პოლიცია იყვნენ მისულები.

გირჩი — მეტი თავისუფლების ლიდერმა, ზურაბ ჯაფარიძემ აღმაშენებლის გამზირზე ბარი გახსნა. მისი თქმით, ამ ფორმით ქვეყანაში დაწესებულ შეზღუდვებს აპროტესტებს. ჯაფარიძემ აღნიშნა, რომ აპირებს ბარი სხვა დღეებშიც ამუშაოს და მხოლოდ იმ შემთხვევაში დაიკეტება, თუ მას დააკავებენ.

მისი თქმით, ეს არის პოლიტიკური დაუმორჩილებლობის აქტი და არღვევს იმ რეგულაციებს, რომლებიც, მისი აზრით, არაკონსტიტუციურია და ადამიანებს წაართვა სიცოცხლის უფლება.

ამ ეტაპისთვის თბილისში ბარ-რესტორნების მუშაობა კვლავ აკრძალულია. რესტორნებისთვის ღია სივრცეში მუშაობა მხოლოდ 15 თებერვლიდან იქნება ნებადართული, შაბათ-კვირის და კომენდანტის საათის გამოკლებით.

მიუხედავად იმისა, რომ შეზღუდვების ნაწილი იხსნება, სხვადასხვა ბიზნესის წარმომადგენლები აცხადებენ, რომ ეს არასაკმარისია და მკაცრი რეგულაციების ფარგლებში შეზღუდვების მოხსნას ითხოვენ. აღნიშნული მოთხოვნებით თბილისში არაერთი აქცია ჩატარდა.