შაბათს რესტორნების მიერ დაანონსებული დაუმორჩილებლობის აქცია აღარ გაიმართება. ამის შესახებ რესტორატორთა ასოციაციის წარმომადგენელმა, შოთა ბურჯანაძემ განაცხადა.

"გუშინდელი გადაწყვეტილება, რომელიც მთავრობის მიერ იქნა მიღებული, ძალიან მკაფიოდ მინდა ვთქვა, რომ ეს არის ყინულის გალღობა და გადამდგარი ნაბიჯი იმ უფსკრულის ამოსავსებად, რაც საზოგადოებასა და ხელისუფლებას შორის შეიქმნა ამ ლოკდაუნებიდან გამომდინარე. [...] ჩვენ, რესტორნებს, როგორც იცით, დაანონსებული გვქონდა შაბათს, როგორც მედიამ მონათლა, დაუმორჩილებლობის აქტი და მე დავარქმევდი თავისუფლებისთვის ბრძოლის აუცილებლობას სიცოცხლის გადასარჩენად. სურვილი გვქონდა მიგვეღო სტუმრები. ჩვეულებრივად დაგვეწყო ფუნქციონირება რეგულაციების ფარგლებში. დღევანდელი გადაწყვეტილება, რომელიც მივიღეთ, არის ის, რომ შაბათს ეს აქცია არ ჩატარდება და ამ რეგულაციებში რაც არის ერთადერთი სერვისი, dilivery-ით გააგრძელებს მუშაობას და ეს არის იმ გადაწყვეტილების, გარკვეულწილად, დაფასება, რაც ხელისუფლებამ გადმოდგა", — განაცხადა ბურჯანაძემ.

მისივე განცხადებთ, თუ 15 თებერვლის შემდეგ ხელისუფლება არ განიხილავს რესტორნების ჩვეულებრივ რეჟიმში ამუშავების საკითხს, დაუმორჩილებლობის აქცია ისევ გაიმართება.

"თუ 15 თებერვლიდან კოვიდ-ვითარების მხრივ ასეთ ციფრებში ვიქნებით და ხელისუფლებას ვერრ ექნება სალაპარაკო, რომ რაღაც კიდევ აფეთქებას მიეცა სიტუაცია, 15-მდე საერთოდ არ ვმონაწილეობთ ამ რთული სიტუაციის შექმნის შემთხვევაში, ჩვენ ვაანონსებთ, რომ ეს დაუმორჩილებლობის აქტი თუ სიცოცხლისთვის ბრძოლის აუცილებლობა გადაიწევს რამდენიმე კვირით, თუ ხელისუფლება არ განიხილავს რესტორნების ნორმალურ ფუნქციონირებას რეგულაციების ფარგლებში", — განაცხადა მან.

როგორც ბურჯანაძემ On.ge-სთან საუბარში დააზუსტა, საქმე ეხება მხოლოდ იმ აქციას, რომელსაც რესტორნები დაუმორჩილებლობის მიზნით აანონსებდნენ და გახსნასაც აპირებდნენ. რაც შეეხება ტურიზმის სექტორის ან სამოქალაქო მოძრაობების მიერ დაანონსებულ აქციებ, ისინი მათ ჩვეულებრივ შეუერთდებიან.

საკოორდინაციო საბჭოს გუშინდელი გადაწყვეტილების მიხედვით, 15 თებერვლიდან კვების ობიექტები, მათ შორის, რესტორნები შეძლებენ იმუშაონ ღია სივრცეში.