წარმოიდგინეთ, რომ ყოველდღიურობით დაღლილი იძინებთ და გაღვიძებისას სრულიად ახალ სამყაროში ხვდებით: პირბადიანი ადამიანები, დახურული მაღაზიები, გადადებული და გაუქმებული ღონისძიებები, მისალმებისა და ხელების დაბანის ახალი წესები... ალბათ იფიქრებთ, რომ პანდემიაში კი არა, სამეცნიერო ფანტასტიკის ჟანრის სიზმარში ხარ.

19 წლის ინგლისელი იოზეფ ფლევილის რეალობა ამის მსგავსია — მან 10 თვე კომაში გაატარა და კორონავირუსის პანდემიის შესახებ ახლაღა, გამოღვიძებისას გაიგო.

2020 წლის 1 მარტს, დიდ ბრიტანეთში ე.წ. ლოქდაუნის გამოცხადებამდე 3 კვირით ადრე თინეიჯერს მანქანა დაეჯახა და კომაში ჩავარდა. ამ მდგომარეობაში ყოფნისას, ის კორონავირუსით ორჯერ ინფიცირდა და გამოჯანმრთელდა კიდეც. თუმცა, კომიდან გამოსვლის შემდეგ, მან პანდემიის შესახებ არაფერი იცოდა.

ავარიის შედეგად იოზეფს ტვინი დაუზიანდა. იმისათვის, რომ ყოველდღიურ ცხოვრებას დაუბრუნდეს, ის მკურნალობას ექიმების მეთვალყურეობის ქვეშ განაგრძობს.

გაღვიძების შემდეგ ოჯახის წევრებმა ვიდეოზარით აუხსნეს, რომ მის გვერდით ყოფნა კორონავირუსის გამო არ შეუძლიათ, თუმცა პანდემიისა და მსოფლიოში არსებული მდგომარეობის შესახებ დეტალებით ჯერ დიდად არ აწუხებენ — 2020 წლის მოვლენების ახსნა მარტივი საქმე როდია.