დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, დადასტურებულია, რომ შემდეგი ვაქცინა, რომელიც საქართველოში შემოვა AstraZeneca იქნება. მისივე თქმით, AstraZeneca-ს ვაქცინა ქვეყანაში, სავარაუდოდ, მარტის დასაწყისში ან თვის განმავლობაში შემოვა.

"გვიან გაზაფხულზე, Covax-პლატფორმაზე იქნება, დაახლოებით, ხუთი ვაქცინა. საქართველოს იმ პირობით აქვს კოვაქსზე ფული გადახდილი და ისეთი ხელშეკრულება გვაქვს, რომ შეგვიძლია ავარჩიოთ ვაქცინა. პირველ ეტაპზე, ვფიქრობთ, რომ თებერვალში, მარტის დასაწყისამდე, Pfizer-ის ვაქცინას ავითვისებთ. შემდეგ AstraZeneca-ს საკმაოდ დიდი პარტია შემოვა. ამ ეტაპზე, რუსულ ვაქცინას არ აქვს ჯანმრთელობის მსოფლიო ორგანიზაციისა და არც სხვა მარეგულირებლების ავტორიზაცია, მხოლოდ რუსეთის მარეგულირებლის ავტორიზაცია აქვს. ის COVAX-პლატფორმაზე განთავსებული არ არის", — განაცხადა გამყრელიძემ.

რაც შეეხება რუსულ ვაქცინას, გამყრელიძის თქმით, ამ ეტაპზე ის არ განიხილება, რადგან რუსულ ვაქცინას ჯანმრთელობის მსოფლიო ორგანიზაციისა და სხვა მარეგულირებლების ავტორიზაცია არ აქვს.

ჯანდაცვის მინისტრის მოადგილის, თამარ გაბუნიას განცხადებით, AstraZeneca-ს 300 000-ზე მეტი დოზა ქვეყანაში პირველ და მეორე კვარტალში უნდა შემოვიდეს.