რუსეთში დაკავებული რუსი ოპოზიციონიერის, ალექსეი ნავალნისა და სხვა პოლიტპატიმრების მხარდასაჭერად საპროტესტო აქციები განახლდა. Deutsche Welle OVD-Info-ზე დაყრდნობით წერს, რომ ქვეყნის მასშტაბით უკვე 465 ადამიანი დააპატიმრეს, მათ შორის 108 ვლადივოსტოკში, 82 კრასნოიარსკში, 56 ნოვოსიბირსკში, 31 ნოვოუკუზნეცკში და 27 ირკუტსკში. მოსკოვში ცხრა ადამიანი დააკავეს, პეტერბურგში — 2. ნავალნის შტაბმა პეტერბურგში აქციის ჩატარების ადგილმდებარეობის შეცვლაზეც განაცხადა.

მედიის ცნობით, ძალოვანი უწყებების წარმომადგენლებმა მომიტინგეებს ჩელიაბინსკში ხელკეტებით სცემეს. განსაკუთრებული სიმკაცრით გამოირჩევიან ძალოვნები ჟურნალისტებიც მიმართაც.

დემონსტრანტები სკანდირებენ: "აკვადისკოტეკა" და "გამოუშვი".

DW-ს კორესპონდენტის ცნობით, პეტერბურგში მეტროს სადგურები დაკეტილია, არ მუშაობს სხვა საზოგადოებრივი ტრანსპორტიც.

გერმანიიდან რუსეთში დაბრუნებული ალექსეი ნავალნი აეროპორტში 17 იანვარს დააკავეს. მას პირობითი მსჯავრის დარღვევას ედავებიან. რუს ოპოზიციონერს 30-დღიანი პატიმრობა შეუფარდეს.

ნავალნის დაკავების გამო რუსეთის რამდენიმე ქალაქში 23 იანვარს საპროტესტო აქციები გაიმართა. ყველაზე მასშტაბური იყო მოსკოვსა და სანქტ-პეტერბურგში. არასანქცირებულ აქციაზე გასული დემონსტრანტები პოლიციამ ძალის გამოყენებით დაშალა და მათ წინააღმდეგ ხელკეტებს იყენებდა. სამი ათასამდე პირი კი დააკავეს.