წყალტუბოს მუნიციპალიტეტის სოფელ ჟონეთში, ადგილობრივები ნამახვანჰესის მშენებლობის წინააღმდეგ პროტესტს აგრძელებენ. ისინი ამბობენ, რომ დღეს დილით, ადგილზე სადაც აქამდე ჯვარი ჰქონდათ აღმართული, აღარ დახვდათ.

"უკიდურესად აღშფოთებული ვართ და ღირსება შელახული. წუხელ, კომენდანტის საათის შემდეგ ქურდულად აიღეს ჯვარი", — ამბობს აქციის ერთ-ერთი ორგანიზატორი, ვარლამ გოლეთიანი.

დღეს პროტესტის 98-ე დღეა. ისინი აცხადებენ, რომ აქციები გაგრძელდება. მათ დღეს დააანონსეს, რომ 7 თებერვალს მასშტაბური აქცია გაიმართება.

წყალტუბოს მერიაში აცხადებენ, რომ "გუშინ, 30 იანვარს კომპანიამ მათ თხოვნით მიმართა, საკითხის დელიკატურობიდან გამომდინარე, უსაფუძვლო ქსენოფობიური და ეთნიკური სპეკულაციების გამორიცხვის მიზნით, მუნიციპალიტეტს მათ კერძო ტერიტორიაზე, სამშენებლო მოედანზე უკანონოდ აღმართული ჯვრის გადატანა მოეხდინა".

"მუნიციპალიტეტმა გაითვალისწინა შექმნილი ვითარება და 30 იანვარს საღამოს, ეპარქიის მღვდელმთავართან შეთანხმებით, მოხდა ჯვრის გადაბრძანება ქუთაისში, ბაგრატის საკათედრო ტაძარში. წყალტუბოს მუნიციალიტეტი ყველას მოუწოდებს, დაიცვან პროტესტის მშვიდობიანი ფორმები და აქციის მონაწილეები არ გაცდნენ კანონით განსაზღვრულ ფარგლებს", — განაცხადეს მერიაში.

გუშინ, 30 იანვარს ნამახვან ჰესთან შეკრებილ აქტივისტებს პოლიციამ კარავი დაუშალა. ადგილზე დააკავეს ერთი პირიც, რომელსაც სამართალდამცავისადმი დაუმორჩილებლობას ედავებიან. ადგილზე რამდენიმე ათეული ადამიანი იყო შეკრებილი და მშენებლობის შეჩერებას მოითხოვდა.

ადგილობრივებს პოლიცია ტერიტორიის დატოვებას სთხოვდა იმ არგუმენტით, რომ კერძო საკუთრებაა. აქტივისტები კი ამტკიცებდნენ, რომ ამ დრომდე აღნიშნული ტერიტორია კომპანიას არ ეკუთვნოდა.

ნამახვან ჰესის მშენებლობას ადგილობრივი მოსახლეობის ნაწილი აპროტესტებს. ხშირად ისინი გზას კეტავენ, კარვებს შლიან და მძიმე ტექნიკას ხელს უშლიან მუშაობაში.