ნამახვან ჰესთან შეკრებილ აქტივისტებს, რომლებიც თითქმის 100 დღე აპროტესტებდნენ ჰესის მშენებლობას, პოლიციამ კარავი დაუშალა. ადგილზე დააკავეს ერთი პირი, რომელსაც სამართალდამცავისადმი დაუმორჩილებლობას ედავებიან.

ნამახვან ჰესის მშენებლობის განახლების მცდელობას დღეს პროტესტი მოყვა. ადგილზე რამდენიმე ათეული ადამიანი იყო შეკრებილი და მშენებლობის შეჩერებას მოითხოვდა.

ადგილობრივებს პოლიცია ტერიტორიის დატოვებას სთხოვდა იმ არგუმენტით, რომ კერძო საკუთრებაა. აქტივისტები კი ამტკიცებდნენ, რომ ამ დრომდე აღნიშნული ტერიტორია კომპანიას არ ეკუთვნოდა. მათ განცხადეს, რომ იმ ტერიტორიაზე განთავსებულ კარვებს თავად არ დაშლიდნენ და სურვილის შემთხვევაში ეს პოლიციას უნდა ექნა.

ნამახვანის ჰესების კასკადის განმახორციელებელი კომპანია ENKA აცხადებს, რომ შესაბამის უწყებებს თავად მიმართეს, რადგან მოსახლეობასთან მოლაპარაკების არაერთი მცდელობის მიუხედავად, დიალოგი არ შედგა.

მათივე განცხადებით, ყველა საჭირო ნებართვა აქვთ, რომელიც გაცემულია შესაბამისი უწყებების მიერ, წარდგენილი კვლევების, საჯარო განხილვებისა და ყველა საჭირო დუკუმენტის ხანგრძლივი და კომპლექსური შესწავლის საფუძველზე. მათი თქმით, პროექტი ხორციელდება უსაფრთხოების უმაღლესი სტანდარტების გათვალისწინებით და სრულ შესაბამისობაშია როგორც საქართველოს, ასევე მაღალი კაშხლების საერთაშორისო კომიტეტის ნორმებსა და სტანდარტებთან.

ნამახვან ჰესის და ზოგადად ჰესების მშენებლობას ადგილობრივი მოსახლეობა აპროტესტებს. ხშირად ისინი გზას კეტავენ, კარვებს შლიან და ხელს უშლიან მძიმე ტექნიკის მუშაობას.